Иранның Бушер атом электр станциясы шабуылдарға қарамастан штаттық режимде жұмыс істеп тұр.
Еуразия Тудейдің хабарлауы бойынша, Америка Құрама Штаттары мен Израильдің соңғы апталардағы Иранның Бушер атом электр станция аумағына жасаған бірнеше зымыран шабуылына қарамастан, станция электр энергиясын қауіпсіз өндіруді жалғастыруда.
Бушер атом электр станциясының қоғаммен байланыс бөлімі қуаттылығы мың мегаватт болатын станцияның толық жұмыс істеп тұрғанын, Иранның ұлттық энергия жүйесіне үлесін қосып жатқаны мәлімдеді.
Мәлімдемеде: “Бұл ұлттық нысан штаттық режимде жұмыс істеп тұр. Қазіргі уақытта ең жоғары халықаралық стандарттарға сәйкес ұлттық энергия жүйесіне электр энергиясын беруді қамтамасыз етуде”,- деп жазылған.
Айта кетейік, Бушер атом электр станциясы маңындағы аудандар Америка Құрама Штаттары мен Израильдің бірнеше әуе және зымыран шабуылдарына ұшырады. Соңғы рет, 4 сәуір күні таңертең Ирандағы Бушер атом электр станциясы аумағындағы қоршауға снаряд тиіп жарылыс болды. Бұл Америка Құрама Штаттары мен Израильдің Ирандағы әскери операциясы басталғаннан бері Бушер атом электр станциясына жасаған төртінші шабуылы.
Бушер атом электр станциясы – Иранның Бушер қаласының маңында орналасқан стратегиялық нысан. Бұл Таяу Шығыстағы алғашқы атом электр станциясы.
Станцияның іргетасы 1975 жылы қаланған, алайда ұзақ уақыт тоқтап тұрғаннан кейін 1995 жылы Росатом компаниясының қатысуымен қайта жанданды.












