Иран Сыртқы істер министрінің орынбасары Саид Хатибзаде Тегеранның ешқашан дипломатиядан бас тартпағанын мәлімдеді.
Еуразия Тудейдің хабарлауы бойынша, бұл туралы Иран Сыртқы істер министрінің орынбасары Саид Хатибзаде Жапонияға барған сапарында айтты.
Саид Хатибзаде сапар барысында халықаралық, аймақтық және екіжақты мәселелер талқыланған бірқатар сараптамалық кездесулерге қатысып, сөз сөйледі.
Хатибзаде сөзінде сионистік режимнің Америка Құрама Штаттарымен келісе отырып жүзеге асырған басқыншы шабуылдары мен лаңкестік әрекеттерін елемеуге болмайтынын атап айтты.
Оның айтуынша, агрессорлар күшпен қол жеткізе алмаған мақсаттарына саяси жолмен де жете алмайды.
Хатибзаде Иран қорғаныс күштерінің табанды қарсы тұруы мен ел халқының бұрын-соңды болмаған бірлігі сионистік режим мен оның жақтастары ондаған жыл бойы таңып келген жалған хабарламаларын жойғанына тоқталып: “Қазіргі сенімнің жоқтығы жағдайында ел басшылығы айқын шеңберді белгілеп берді.
Біз дәл осы бағытта әрекет етеміз. Бұл жолдың ешқашан берілуге апармайтынын бәрі білуі тиіс”,- деді.
Хатибзаде Иран ешқашан дипломатиядан бас тартпағанын, алайда қарсы тарап өз ниетінің адалдығын дәлелдеуі тиіс екенін баса айтты.
Сондай-ақ, Иран Сыртқы істер министрінің орынбасары еуропалық үш елдің Snapback механизмін қайтару шешімін құқықтық, саяси және стратегиялық қате деп атады.
Оның айтуынша, халықаралық құқыққа сәйкес, БҰҰ Қауіпсіздік кеңесінің 2231 қарары 2025 жылдың 18 қазанында аяқталды. Бұл фактіні Қосылмау қозғалысының 121 елі, сондай-ақ БҰҰ Қауіпсіздік кеңесінің екі тұрақты мүшесі растады. Хатибзаденің сөзінше, бұл әлемдік қауымдастықтың ұстанымын айқын көрсетеді.
Хатибзаде сөзінің соңында: “Біз кез келген ықтимал сценарийді назардан тыс қалдырмаймыз.
Иранның егемендігі мен халқын қорғауға нық ниеттеміз. Халықаралық қарым-қатынастағы гегемония мен диктатураны көпжақты ынтымақтастықты дамыту арқылы ғана жеңуге болады”, -деді.












