Иран Қарулы күштері қарсыласын тежеу үшін қанша зымыран қажет болса, сонша зымыран ұшыруға дайын.
Еуразия Тудейдің хабарлауы бойынша, бұл туралы Иран Ислам революциясы Сақшылар корпусының Әуе ғарыш күштері қолбасшысының кеңесшісі Әли Балали мәлім етті.
Бригада генералы Әли Балали зымыран технологиялары көптеген басқа әдістер мен қару түрлеріне қарағанда күрделірек әрі қауіпті екенін айтты.
Көрмеге қойылған әскери өнімдерге тоқталған Балали барлық экспонаттың ел ішінде әзірленіп, өндірілгенін атап айтып: «Біз әлемдік білімді тиімді пайдалана білдік. Елге қарсы енгізілген шектеулер мен санкциялар, сондай-ақ оларды ұйымдастырушылардың әрекеттері Иран Ислам Республикасының қуатын арттыруға бөгет бола алмайды.
Санкцияларға қарамастан, зымыран өндірісі, ұшқышсыз ұшу аппараттары және басқа да салаларда ілгерілеушілікке қол жеткіздік», —деді.
Балали, сонымен бірге, 1980 жылдардағы Иран-Ирак соғысы кезінде елдің зымыран технологиялары саласында тап болған шектеулерін еске алды. Оның айтуынша, сол кезеңде Тегеран бұл бағытта елеулі кедергілерге кезіккен.
Генерал: «Сегіз жылдық қорғаныс кезеңінде біз бар-жоғы 88 зымыран ұшырдық», —деді. Ол сол кезде қару-жарақтың өте қымбат болғанын және Иранда мұндай шығынды толық өтейтіндей жеткілікті ресурс болмағанын айтып: «Сол себепті соғыс аяқталғанша әскери операцияларды тоқтатпау үшін зымырандарды сирек әрі санаулы мөлшерде ғана қолдануға мәжбүр болдық. Ал бүгінде, ондай түйткілдер артта қалды», —деді.
Әли Балали Иранның қазіргі қорғаныс әлеуеті елге жасалған кез келген шабуылға соққы беруге қауқарлы екенін айтты. Оның айтуынша, жуырдағы басқыншылық кезінде қарсылас тарап шектеулі соққы жасаған, ал Иран оған еселеп жауап қайтарған.
Генералдың сөзінше, Иранның зымыран өндіру және оны ұшыру қарқыны, тіпті әскери текетірес бірнеше жылға созылған күннің өзінде де, операцияларды қазіргі қарқынмен ары қарай жүргізуге мүмкіндік береді.
Ол сондай-ақ Иран билігінің елдің әскери әлеуеті мен қару-жарағын тиімді қолдануға қатысты кешенді жоспары бар екенін мәлім етті. Балалидің мәлімдеуінше, бұл жоспарлар Ислам революциясының Жоғарғы көшбасшысы аятолла Сейед Моджтаба Хаменеидің басшылығымен және бақылауымен жүзеге асырылып жатыр.












