Бүгін, жұма, маусымның 28 күні Иранда кезектен тыс президенттік сайлауға дауыс беру басталды.
Еуразия Тудейдің хабарлауы бойынша Ирандағы кезектен тыс президент сайлау өтетін учаскелер жергілікті уақыт бойынша таңғы сағат 08:00-де ашылып, 18:00-де жабылады. Қажет жағдайда елдің Ішкі істер министрі сайлауда дауыс беру уақытын ұзарту туралы жарлық шығара алады.
Дауыс беру бүкіл ел бойынша 58 мыңнан астам учаскеде өтеді. Сайлау модераторлардың, байқаушылардың және кандидаттардың өкілдерінің қатысуымен өтеді. Сондай-ақ, президенттік сайлаудың осы кезеңінде дауыс беру қағаз жүзінде жүргізіледі.
Иранның діни жетекшісі Әли Хаменеи БАҚ алдында дауыс беріп, еліндегі сайлау күнін «қуаныш пен шаттық күні» деп атады.
Иран Ислам республикасындағы 14-ші президенттік сайлауда 61 452 321 сайлаушы елдің іші мен шетелдерде дауыс беруге құқылы.
Президенттікке төрт үміткер — Масуд Пезешкиан, Мұстафа Поурмохаммади, Саид Джалили және Мохаммад Бағер Ғалибаф бәсекелеседі.
13-ші Үкіметтің президенті аятолла Ибраһим Раиси мен оның серіктері 2024 жылғы 19 мамырда тікұшақ апатынан қайтыс болды. Иран Конституциясының 131 және 132 баптарына сәйкес президенттің міндетін атқарушы болып бірінші вице-президент Мұхаммед Мохбер тағайындалды.
Иран төңкерісінің жоғарғы жетекшісі аятолла Хаменеидің жарлығымен атқарушы биліктің басшысына заң шығарушы және сот билігінің басшыларының көмегімен 50 күн ішінде сайлау өткізу тапсырылды.












