Израиль әскери-әуе күштері Иран астанасы Тегеран мен осы елдің батысындағы нысандарға соққы берді.
Еуразия Тудейдің хабарлауынша, сионистік режимнің лаңкес армиясы Тегеран мен Иранның батысындағы бірқатар нысанға шабуыл жасады.
Кейбір дереккөздері сионистік режимнің Тегеран, Исфаһан, Табриз бен Иранның батысындағы басқа да мекендердегі нысандарға соққы жасалғанын хабарлауда. Сондай-ақ, Караж қаласы жақтан да жарылыс дыбыстары естілген.
Һузестан останы әкімінің қауіпсіздік және құқықтық тәртіп жөніндегі орынбасары Уәлиолла Хаяти сионистік дұшпанның Маһшаһрдағы «Карун» мұнай-химия компаниясына әуеден шабуыл жасағанын хабарлады.
Исфаһан останы әкімінің орынбасары да бүгін дүйсенбі күні таңертең Наджафабад қаласындағы бір нысанға сионистік режим шабуыл жасағанын, қуанышқа орай ешкімнің зардап шекпегенін хабарлады.
Израиль армиясы Иранға шабуыл жасағанын ресми түрде мойындап, әскери-әуе күштері Иранның батыс және орталық аймақтарындағы Иран Ислам Республикасына қарасты бірқатар нысан мен әскери нысандарға соққы жасағанын мәлімдеді.
Айта кетейік, Ақ үй өз мәлімдемесінде «Америка Құрама Штаттары Израильдің Иранға жасаған шабуылына қатысқан жоқ» деп ресми түрде мәлімдеме жасағаннан бірнеше сағат өтпей-ақ, Бениямин Нетаньяхуға жақын «Исраэль Хайом» газеті Вашингтонның өтірігін әшкере етті.
Аталған ақпарат көзі бүгін, дүйсенбі күні таңертең израильдік сенімді дереккөзіне сілтеме жасап, Израиль Иранға шабуылды Америка Құрама Штаттарымен алдын ала келісіп жасағанын әшкереледі.
«Фарс» агенттігінің мәліметінше, кеше түнде, сионистік режимнің Ливанның оңтүстігіне жасаған шабуылынан бірнеше сағат өткен соң, Ислам Республикасының Қарулы Күштері басып алынған аумақтарды зымырандармен және ұшқышсыз ұшу аппараттарымен нысанаға алды.
Иврит тілді бұқаралық ақпарат құралдары Израильдің Иран тарапынан болатын зымырандық шұғыл жауапқа дайындалып жатқанын хабарлады.
Басып алынған аумақтарда жалпыұлттық дайындық режимі жариялануымен бір уақытта Израильде мектептер де жабылды.
Ақпарат көздерінің хабарлауынша, сионистер басып алынған жерлерде жоғары деңгейдегі қауіп пен әскери дайындық жағдайында тұр.
Еске салайық, бұл биыл сәуірдің 7 күні Иран мен АҚШ және Израиль арасында жасалып, кейін алпыс күнге ұзартылған атысты тоқтату бітімінің алғаш рет бұзылуы емес. АҚШ мен сионистік режимнің әуе ғарыш күштері Ормұз бұғазында әртүрлі сылтаумен зымыран мен снарядтар арқылы атыс ашып, онсыз да әлсіз бітімді сан рет бұзды.
Израиль Иранмен арадағы атысты тоқтату бітімін бұзып, шабуыл жасағаннан кейін Иран қарымта әрекетте басып алынған жерлерге зымыранмен соққы жасады.
Ақпарат көздері бұл зымыранның Иордан өзенінің Батыс жағалауындағы Наблус қаласында орналасқан сионистік Итамар елді мекеніне құлағанын мәлімдеді.
Кеше жексенбі күні түнгі сағат 22:35-те сионистік режимнің бұқаралық ақпарат құралдары басып алынған аумақтарда дабыл қағылып, Израильдің кейбір аймақтарына зымыранмен соққы жасалғанын хабарлады.
Иран қарулы күштерінің қоғамдық байланыс бөлімі Израильдің «Рамат Давид» әуе базасына баллистикалық зымырандар атылғанын мәлімдеді.
Бұл шабуылдар әдепкіде басқыншы сионистік режимнің Ливанның оңтүстігінде жасаған ауқымды қылмыстарына, сондай-ақ Сур, Набатия және басқа да аймақтардағы, соның ішінде Бейруттің Дахия ауданындағы жазықсыз халықты жаппай қырып-жойып, босқынға айналдырғанына жауап ретінде жасалды.
Алайда Израиль кеше және бүгін Иран астанасы Тегеран мен осы елдің басқа өңірлеріндегі әскери нысандарға зымыранмен шабуыл жасағаннан кейін Иран «Шынайы уәде-5» операциясын жүзеге асырып, басып алынған аумақтарға зымыран атқылады.
Иран қолбасшылығы Израильге бұл операцияның бір реттік шара емес екенін, алдағы жеті күн бойы дұшпанның беті қайтып, қылмыстарын тоқтатқанға дейін тәулік бойы зымырандар мен ұшқышсыз ұшу аппараттары ұшырылатынынын, Иран аумағына жасалған кез келген соққыға жойқын әрі есеңгірететін жауап берілетінін баса айтты.
Айта кетейік, АҚШ Президенті Дональд Трамп Иранның Израильге жасаған зымыран шабуылдарына алғашқы реакцияда Нетаньяхудан Иранға жауап бермеуді сұрайтынын айтып: “Иранға айтарым: сендер өз зымырандарыңды ұшырдыңдар, осы жеткілікті», — деді.
Трамп Иранның бұл жойқын жауабынан және сионистік режимге қарсы қоқан-лоқыларын іс жүзінде асырғанынан қорыққанын байқататын рай танытып, Ираннан тек осы зымырандық шабуылдармен шектелуді өтінді.
Еске салайық, бұл — АҚШ мен атысты тоқтату бітімі орнатылғаннан бергі Иранның алғашқы қарымта әрекетке баруы.












