Өзбекстан Республикасының Президенті Шавкат Мирзиёев ресми сапармен Мәскеуге келді.
ӨР Президенті баспасөз қызметінің хабарлауынша Внуково-2 әуежайында Өзбекстан Республикасының Мемлекет басшысын Ресей Федерациясы Премьер-Министрінің орынбасары – Индустрия және сауда министрі Денис Мантуров және басқа да ресми тұлғалар күтіп алды.
Мәртебелі мейманның құрметіне Өзбекстан мен Ресейдің мемлекеттік тулары көтеріліп, құрметті қарауыл жасақталып, салтанатты түрде қарсы алу рәсімі өтті.
6 қазанда екі ел басшылары шағын және кеңейтілген құрамда келіссөздер жүргізіп, Өзбекстан-Ресей жан-жақты стратегиялық серіктестік пен одақтастық қатынастарын одан әрі тереңдету мәселелері талқыланады.
Саяси, сауда-экономикалық, инвестициялық, көлік-коммуникация, мәдени-гуманитарлық және басқа да басым бағыттардағы жан-жақты ынтымақтастықтың жай-күйі мен кеңейту перспективаларын қарастыру жоспарлануда. Өңірлік және халықаралық күн тәртібіндегі өзекті мәселелер бойынша пікір алмасу болады.
Өзбекстан басшысы Ресей Федерациясы Үкіметінің төрағасы Михаил Мишустинмен де келіссөздер жүргізеді.












