Ресей мен АҚШ президенттері Владимир Путин мен Дональд Трамп жақында кездесетін болды.
Еуразия Тудейдің ТАСС агенттігіне сілтеме жасап хабарлауы бойынша, қазір уақытта саммитке даярлық басталды.
Бұл туралы РФ президентінің көмекшісі Юрий Ушаков тілшілерге мәлімдеді.
Ушаков: “Америкалық тараптың ұсынысы бойынша Владимир Путин мен Дональд Трамптың жоғары деңгейдегі екіжақты кездесуін жақын күндері ұйымдастыру туралы келісілді”, — деді.
Ушаковтың айтуынша, қазір Ресей билігі америкалық әріптестерімен бірге қажет жұмыстарды нақтылауды бастады.
Кремль өкілі: “Айта кететін мәселе, екі ел президенттерінің кездесу орны да белгіленді. Бұл туралы сәл кейінірек хабарлаймыз”, — деді.
Бұған дейін Дональд Трамп Украинадағы қақтығысты тоқтату және Путинмен кездесу туралы айтты. Ол 6 тамыз күні Путин мен өзінің арнайы өкілі Стив Уиткоффтың Мәскеудегі кездесуіне тоқталып: “Біз кездесудің қайда өтетінін нақты шешкен жоқпыз. Бірақ, Путинмен жақсы келіссөз жүргіздік”, — деді.
The New York Times басылымы мұның алдында дереккөзге сілтеме жасап, Трамп келесі аптада Путинмен жеке кездесіп, кейін көп ұзамай Владимир Зеленскийдің қатысуымен үшжақты кездесу өткізетінін жазды.
CNN хабарлауынша, АҚШ президенті командасына кездесулерге дайындықты бастауды тапсырған.
АҚШ-тың қазіргі президенті Дональд Трамп Ресеймен қарым-қатынасты қалпына келтіруге бейілділік көрсетуде.


















