Қытай Зеленскийдің «Украина соғысына Қытай әскерилері қатысып жүр» деген сөзін негізсіз деп атады.
Еуразия Тудейдің хабарлауы бойынша Қытай Украинада бейбітшілік орнату жолындағы талпыныстарға қолдау көрсететінін тағы мәлімдеп, осы оқиғамен байланысты тараптарға негізсіз сөздерден сақтану туралы ескертті.
Бұл ескерту Украина Президенті Владимир Зеленскийдің «Ресейлік әскерилердің қасында Қытай азаматтары жүр» деген сөзіне қаратып айтылды.
Зеленский кеше, Украинаның барлау ұйымы Украина соғысында қытайлық 155 азаматтың жүргені туралы мәліметке ие екенін айтты. Ол бұл сөзді Ресей әскерилері ілгерілеп бара жатқан Украинаның шығысында қытайлық екі азамат ұсталғаннан кейін мәлімдеді.
Қытай СІМ баспасөз өкілі Лин Цзянь: “Қытайдың Украина дағдарысын бастаушы да емес, соған шырмалған ел де емес екенін баса айтқым келеді. Біз дағдарыстың бейбіт жолмен шешілуінің мықты қолдаушысы әрі белсенді ілгерілетушісіміз”, — деді.
Ол хабар брифингінде Зеленскийдің немесе басқа тұлғаның есімін атамастан: “Біз қатысты тараптардан Қытайдың рөлін дұрыс және орынды түсінуді қалаймыз. Жауапсыз сөз айтудан бойтартуды сұраймыз”, — деді.
Ресеймен шектеусіз серіктестік жасайтынын жариялаған Қытай өзін соғысты тоқтату жолындағы ойыншы ретінде таныстыруға күш салуда.
Қытай 2022 жылы Ресейдің Украинадағы соғыс амалдарын сынаудан тартынып, соғысты тоқтату үшін бағдарлама ұсынды.
Зеленский Ресей әлеуметтік желілер арқылы Қытай азаматтарын тартуымен айналысып жатыр деген уәж айтып: “Қытай басшылары бұл тақырыптан хабардар. Украинаның қауіпсіздік қызметі олардың аты-жөні, туған күндері және олар орналасқан ресейлік әскери бөлімдердің тізімін жасады. Украина соғыста жүрген Қытай әскерилері Бейжіңнен бұйрық алған, алмағанын тексеріп жатыр”, — деді.
Қытай Зеленскийдің бұл сөзін негізсіз деп атады.
Қытайдың баспасөз өкілі ел Үкіметінің өз азаматтарынан қарулы қақтығыс аймақтарынан бойларын аулақ салуды, әсіресе екі тарап жақтағы әскери амалдарға қатыспауды сұрайтынын баса айтты.
Украина мен Батыс елдері “Ресейдің Курск облысына 11 мыңнан астам солтүстіккореялық сарбазды жіберу” деп сипаттаған оқиғадан кейін Зеленский Қытай азаматтарын орналастыруды Ресейдің соғыстағы «екінші қателігі» деп атады.
Ресей Зеленскийдің “Қытай әскерилері” деген сөзіне әлі ешқандай реакция білдірмеді және Солтүстік Корея күштерінің Курск аймағына атандырылғанын да ешқашан нақты растамады.












