Қытайдың Бейжің және Сиань қалаларында Алматы қаласының туризм күндері өтеді.
Еуразия Тудейдің Алматы қаласы әкімдігіне сілтеме жасап хабарлауы бойынша, қазанның 14 күні Қытайдың Сиань қаласында және 16 қазан күні Бейжіңде Алматы қаласының туризм күндері өтеді.
Аталмыш іс-шараның мақсаты – туристік саладағы халықаралық ынтымақтастықты дамыту мен нығайту және Алматы қаласына туристерді тарту.
Шара аясында ҚХР-ның жетекші шетелдік туроператорларының, халықаралық әуе компанияларының, туристік қауымдастықтар мен қонақүйлердің өкілдерімен келіссөздер жоспарланған.
Кездесу қорытындысы бойынша Қазақстан мен Қытай арасындағы туристік ағынды арттыруға бағытталған ынтымақтастық туралы меморандумдарға қол қою күтілуде.
Алматы қаласының туризм күндері қаланың бірегей туристік өнімдері таныстырылып, қолөнершілердің шеберлік сағаттары ұйымдастырылады. Сонымен қатар қазақстандық әртістер өнер көрсетеді.
Іс-шара соңында ҚХР-ның ірі туроператорлары арасында ұтыс ойыны өткізіледі. Жеңімпаздар Алматы қаласына келіп, «Медеу» мен «Шымбұлақ» сияқты қаланың танымал туристік орындарымен таныса алады.
Айта кетейік, қыркүйек айының 30 күні ҚХР-ның Тяньцзинь қаласының музейінде «Алтын адам және Ұлы дала» халықаралық көрмесінің салтанатты ашылу рәсімі өтті. Көрме 2025 жылдың 12 ақпанына дейін жалғасады.



















