Қытайдың Shenyang Aerospace Xinguang Group компаниясы теңіз операциялары мен ғылыми зерттеулерде қолдануға болатын әлемдегі алғашқы роботты кит акуласын жасап шығарды.
Еуразия Тудейдің қытайлық БАҚ-на сілтеме жасап хабарлауы бойынша, робот акуласының ұзындығы шамамен бес метр, ал салмағы шамамен 350 килограмм болады. Робот нағыз кит акуласының қимылдарын, соның ішінде жүзуді, бұрылуды, сүңгуді, тіпті ауыз қозғалысын дәл қайталай алады.
Роботты акуланың жылдамдығы секундына 0,7 метрге дейін жетеді және 20 метрге дейінгі тереңдікке сүңгуге қабілетті. Оптикалық камералармен, әртүрлі сенсорлармен және BeiDou жүйелерімен жабдықталған бионикалық робот акуланы судың сапасын бақылау, су астындағы рельефті картаға түсіру, әскери салада және басқа да көптеген тапсырмаларды орындау үшін пайдалануға болады.
Shenyang Aerospace Xinguang Group компаниясының пікірінше, жасанды интеллект саласындағы жетістіктерінің арқасында кит акуласы сияқты бионикалық роботтар теңіз операциялары мен ғылыми зерттеулерде төңкеріс жасау мүмкіндігіне ие. Осыған байланысты компания теңіз бионикалық технологиялары мен интеллектуалды жүйелердің интеграциясын ілгерілетуді жалғастыруға ниетті.



















