Беларусь сарапшысы Алексей Дзермант Арменияның Ұжымдық қауіпсіздік туралы шарт ұйымына мүшелігін тоқтату туралы шешімін «саяси демарш» санайды.
«Солтүстік Еуразия» континентальды интеграцияны зерттеу және дамыту орталығының директоры Алексей Дзермант бұл пікірімен РИА Новости сайтымен бөлісті.
Сарапшы Арменияның ҰҚШҰ-нан уақытша шығуын бір жағынан саяси мағынадағы демарш деп атаса, екінші жағынан Арменияның Батыс мемлекеттері АҚШ, Ұлыбритания, Франция, ЕО елдерімен әскери-техникалық ынтымақтастық туралы келіссөз жүргізуін алаңдатарлық мәселе деп атады.
Сарапшының пікірінше, Арменияның бұл әрекеті Батыс мемлекеттеріне қарай ынтымақтастыққа бет бұруын көрсетеді.
Алексей Дзермант Арменияның Ұжымдық қауіпсіздік туралы шарт ұйымына мүшелігін уақытша тоқтатуының жақсы нәрсемен аяқталуы екіталай деп есептейді. Сарапшының пайымдауынша, бұл ең алдымен Ресей үшін қолайсыз.
Жалпы, соңғы жылдары Ереван ҰҚШҰ жиындарына қатысуды тоқтатты. Тіпті, биыл ақпан айында Никол Пашинян Арменияның Ресейге кері бұрылмайтынын мәлімдеді. Армения премьер-министрі қауіпсіздік саласында өзге елдермен бірлесіп жұмыс жасауға дайын екенін де айтты.
Бұған дейін де сарапшылар Арменияның Ресейге тәуелділіктен құтылу мақсатында Батысқа толық бет бұруы мүмкін болмағанымен, біртіндеп саясатын әртараптандыру мақсатында түрлі әрекет жасауға көшкенін айтқан болатын.
Еске сала кетсек, Армения премьер-министрі Никол Пашинян Арменияға қатысты ұжымдық қауіпсіздік туралы шарты орындалмауына байланысты Ереванның ҰҚШҰ-на қатысуын тоқтатқанын мәлімдеді.
ҰҚШҰ құрамына алты мемлекет кіреді: Армения, Беларусь, Қазақстан, Қырғызстан, Ресей және Тәжікстан.












