Стамбұлдағы католик шіркеуіне қарулы шабуыл жасалды.
Түркияның Стамбұл қаласындағы католик шіркеуіне қарулы шабуыл жасалғанын Түркияның ішкі істер министрі Али Йерликая Х әлеуметтік желісіндегі парақшасында хабарлап, бұл сұмдық шабуылды қатаң айыптайтынын мәлімдеді.
Осы мәліметке сәйкес, бүгін қаңтардың 28 күні Түркия уақытымен түскі сағат 11.40 шамасында Сарыер Бүйүкдере ауданындағы Санта Мария шіркеуінде діни қызмет ету кезінде бетперде киген 2 адам қарулы шабуыл жасаған. Салдарынан бір адам қайтыс болған.
Бұл оқиға туралы Стамбұл қаласының мэрі Экрем Имамоглу да Х әлеуметтік желісінде жазба қалдырды:
«Сарыердегі Санта-Мария шіркеуінде жексенбілік қызметке жасалған қарулы шабуылды айыптаймын. Қайтыс болған К.Т.-ға Алла разы болсын, зардап шеккендерге шипа тілеймін. Қаламыздағы діни орындарға шабуыл жасап, бірлігіміз бен тыныштығымызды бұзғысы келетіндерге ешқашан жол бермейміз».
CNN Turk агенттігінің мәліметіне сәйкес, Түркия Президенті Режеп Тайып Ердоған Стамбулдың Сарыер қаласындағы Санта-Мария итальяндық шіркеуіне жасалған шабуылға байланысты Сарыер ауданының әкімі Өмер Калайлы, Санта-Мария итальяндық шіркеуінің діни қызметкері Антон Булаи және Польшаның Стамбулдағы бас консулы Витольд Лесниакпен телефон арқылы сөйлесті. Ердоған сұхбатта қылмыскерлерді тез арада ұстау үшін қажетті шара қабылданып жатқанын айтты.
Vesti.az сайтының A-haber телеарнасына сілтеме жасап хабарлауы бойынша Түркия президенті Ердоған: «Қарулы шабуыл салдарынан бір адамның қаза болуына байланысты жұртшылыққа көңіл айтамын. Қылмыскерлерді ұстау үшін қажетті шаралар қабылданып жатыр. Шабуылға қатысушыларды 24 сағат ішінде тауып, ұстаймыз деп үміттенеміз», — деді.












