Ақордада өткен Түркі мемлекеттері ұйымының мерейтойлық Х саммиті барысында ұйымға төрағалық Өзбекстаннан Қазақстанға табысталып, президенттер қауіп-қатерге қарсы бірігу, өзара көмек-көрсету, мәдени-экономикалық байланыстарды жандандыру жайында пікір алмасты және түркі әлемін бірлесе өркендету жайын қозғады.
Саммит барысында Қасым-Жомарт Тоқаев Қазақстанның Түркі мемлекеттері ұйымын одан әрі дамытуға мүдделі екенін айта келіп, Қазақстанның ұйымға төрағалығы «Түркі дәуірі!», яғни «TURKTIME!» ұранымен өтетінін мәлімдеді.
Бұл ретте Мемлекет басшысы еліміздің салт-дәстүр (Traditions), біріздендіру (Unification), реформалар (Reforms), ғылым (Knowledge), сенім (Trust), инвестиция (Investments), медиация (Mediation) және энергия (Energy) атты сегіз мәселеге басымдық беретінін атап өтіп, олардың әрқайсысына жеке-жеке тоқталды.
Саммитте Өзбекстан Президенті Шавкат Мирзиеев, Әзірбайжан Президенті Ильхам Әлиев, Қырғызстан Президенті Садыр Жапаров, Түркия Президенті Режеп Тайып Ердоған, Түркіменстан Халк Маслахатының Төрағасы Гурбангулы Бердімұхамедов, Мажарстан Премьер-министрі Виктор Орбан, Түркі мемлекеттері ұйымының Бас хатшысы Кубанычбек Өмірәлиев сөз сөйледі.
Өзбекстан Президенті Ташкентте Түркі даму банкін құруды ұсынды.
Ал Түркия Президенті Режеп Тайып Ердоған бауырлас елдерді өзара виза байланысын жетілдіруге үндеді. Сондай-ақ ол ортақ әліпби мәселесі туралы пікір білдірді.
Қырғыз Президенті Садыр Жапаров көшпенділер ойынының тізіміне қырғыз ойындарын енгізуді және Джалал-Абад қаласын 2025 жылы Түркі әлемінің орталығы ретінде жариялауды ұсынды. Сонымен қатар Жапаров Түркі мемлекеттері ұйымына мүше және байқаушы мемлекеттердің қатысуымен 2024 жылы цифрлық форум өткізу қажеттігін атап өтті.
Әзірбайжан Президенті Ильхам Әлиев Қазақстан Президенті Қасым-Жомарт Тоқаевқа Қазақстанның Әзірбайжанға шығармашылық орталығын сыйға тартқаны үшін зор ризашылығын білдіре келе Түркі мемлекеттерінің қорғаныс саласындағы ынтымақтастығын нығайтуға үндеді.
Түркіменстан Халк Маслахатының Төрағасы Гурбангулы Бердімұхамедов әлемде кикілжіңнің артып кетуіне назар аудартып, жаһандық қауіпсіздік стратегиясын әзірлеуде үш ұстанымға арқа сүйеу қажеттігін алға тартты.
Саммит қорытындысы бойынша мемлекеттер басшылары кезекті саммиті келер жылы Қырғызстанда өткізуге уағдаласып, ұйымға бірқатар мақсат-міндет жүктеді. Бұдан бөлек, маңызды құжаттарға қол қойылды.
















