Қасым-Жомарт Тоқаев Украинаға қатысты келіссөздердің басталуын құптайтынын мәлімдеді.
Еуразия Тудейдің Ақорда баспасөз қызметіне сілтеме жасап хабарлауы бойынша Мемлекет басшысы бұл туралы «Орталық Азия – Еуропа Одағы» саммитінде сөйлеген сөзінде мәлімдеді.
Қасым-Жомарт Тоқаев Украинаға қатысты келіссөз процесіне қолдау білдірді.
Президент: “Қазақстан кез келген қақтығыстың бейбіт жолмен шешілуін жақтайды. Сондықтан Украинаға қатысты келіссөздердің басталуын құптаймыз. Мәселенің күрделі екенін түсінеміз. Дегенмен шиеленіс оң шешімін табады деп үміттенеміз”, – деді.
Айта кетейік, Мемлекет басшысы Қасым-Жомарт Тоқаев мұның алдында, яғни, 2025 жылғы 13 ақпанда да Украина төңірегіндегі жағдай туралы пікір білдіріп, еліміздің тыныштығы мен тұрақтылығы ең басты құндылық екеніне назар аударған болатын.
Президент: «Қазір Украина жөнінде көп айтылып жатыр. Біз алғашқы кезден бастап осы соғысты міндетті түрде тоқтату керек, дипломатиялық келіссөздер арқылы бір мәмілеге келу қажет деп айттық. Бұл ұстанымымыз енді шындыққа айналды. Екі алпауыт ел саяси сұхбат жүргізе бастады. Бұл – жақсы үрдіс. Әрі Қазақстанға пайдасын тигізеді. Сондықтан біз мұны мейлінше қолдаймыз», – деді.












