Америка Құрама Штаттары мен Иран арасында дипломатиялық келісім жасалмаса, Иран Израильге жойқын шабуыл жасайды.
Еуразия Тудейдің хабарлауы бойынша, мұндай пікірді РФ Мемлекеттік Думасының депутаты Анатолий Вассерман aif.ru басылымына берген сұхбатында білдірді.
Исламабадтағы Америка Құрама Штаттары мен Иран арасындағы алғашқы келіссөз аяқталды. Алайда аймақтағы жағдай әлі өте күрделі. Сарапшы Анатолий Вассерманның айтуы бойынша, қазіргі тыныштық уақытша. Бұл ықтимал үлкен қақтығыстың алдындағы дайындық.
Америка Құрама Штаттары мен Иранның 11 сәуір күні Исламабадта өткен келіссөздері өте құпия жағдайда өтті. Қазіргі уақытта екі аптаға атысты тоқтату режимі жарияланды.
Вассерманның пікірінше, Иран бұл уақытты жайдан-жай алған жоқ. Олар үзілісті жерасты қоймалары мен зымыран арсеналдарын ретке келтіру үшін пайдаланады.
Сарапшының айтуы бойынша, егер дипломатиялық келісім болмаса, Иран Израильге шабуыл жасайды және Иранның беретін жауабы жойқын болады.
Анатолий Вассерман Америка Құрама Штаттары Ираннан келіссөз жүргізуді емес, іс жүзінде тізе бүгуді талап етіп отырғанын айтады.
Америка Құрама Штаттары Иранның ядролық зерттеулерін тоқтатып, зымыран мен дрон жасаудан бас тартуын және өз одақтастарына қолдау көрсетпеуді талап етуде.
Иран үшін мұндай шарттарды қабылдау елінің мемлекет ретінде жойылуымен тең. Сондықтан Иран басқа біреуге бағынып, қор болып өлгенше, соғыста намыспен қаза тапқанды жөн көреді.
Мұның алдында Дональд Трамп Ормұз бұғазын толық қоршауға аламыз деп сес көрсетті. Бұған жауап ретінде Иран күтпеген қадам жасап, бұғаздың арғы бетіндегі Оман Сұлтандығымен келісімге келді. Иран бұғаздан өтетін кемелерден алынатын салықты Оманмен тең бөлісуді ұсынды.
Иран осындай қадам арқылы өзіне маңызды одақтас тауып, Америка Құрама Штаттарының блокада жоспарына экономикалық соққы берді. Енді Вашингтонға бұл бұғазды бұғаттау экономикалық тұрғыдан қиынға соғады.
Сонымен қатар, қазіргі таңда Израиль премьер-министрі Биньямин Нетаньяхуға қатысты жағдай ушығып, оған халықаралық деңгейде үлкен айыптар тағылуда.
Түркия прокурорлары Нетаньяхуды геноцид айыбымен мың жылдан астам уақытқа түрмеге кесуді сұрап отыр.
Сарапшы Вассерманның айтуы бойынша, Нетаньяху үшін ең үлкен қауіп Түркия емес, өз отаны Израиль. Израильде оған қарсы бірнеше қылмыстық іс қозғалған. Ол тек премьер-министр болып тұрғандықтан ғана түрмеден аман жүр. Биліктен кеткен бойда оны өмір бойына бас бостандығынан айыру жазасы күтіп тұр.
Вассерманның пікірінше, қазіргі келіссөздің бірінші кезеңі тек уақыт ұту амалы сияқты. Егер Америка Құрама Штаттары өз талаптарын жұмсартпаса, аймақтағы ірі соғыстың алдын алу қиын болады. Ал Нетаньяхудың саяси мансабы аяқталған соң, оны сот пен түрме күтіп тұрғаны анық.












