Иран Конституциясына сәйкес, Рухани Жетекшіні сайлау міндеті Сарапшылар кеңесіне жүктелген.
Еуразия Тудейдің хабарлауы бойынша Иран Ислам Республикасының Конституциясына сәйкес, Рухани Жетекшіні сайлау міндеті Сарапшылар кеңесіне (Мәжіліс-е Хобреган) жүктелген. Жаңа жетекші сайланғанға дейін жетекшінің істеріне уақытша кеңес жауапты болады.
Конституцияны қорғау кеңесінің ресми өкілі Хади Тахан Назиф Иран Ислам Республикасының құқықтық жүйесі мен Конституциясында бұл мәселеге қатысты ешқандай түсініксіз тұстар жоқ, барлық шара егжей-тегжейлі қарастырылғанын айтты. Осы ел Конституциясының сегізінші тарауы Жетекшілікке, оны сайлауға және Уақытша жетекшілік кеңесін құруға арналған.
Жаңа жетекшіні сайлау — Сарапшылар кеңесінің міндеті. Конституцияның 111-бабына сәйкес, Сарапшылар кеңесі мәжіліс өткізіп, жаңа жетекшіні сайлағанға дейін Президенттен, Сот билігінің басшысынан және Конституцияны қорғау кеңесінің фиқһ мамандары (фақиһтар) арасынан бір мүшеден тұратын Уақытша жетекшілік кеңесі мемлекеттік істерді уақытша басқаруды өз мойнына алады.
Революция жетекшісінің көмекшісі әрі кеңесшісі Мохаммад Мохбер де былай деп мәлімдеді: “Революция жетекшісі шейіт болғаннан кейінгі өтпелі кезеңде жауапкершілікті Президент, Сот билігінің басшысы және Конституцияны қорғау кеңесінің фақиһтарынан (діни заңгерлерінен) бір мүше өз мойнына алады».
Мохбер Ислам революциясы жолының жалғастығын баса айтып: “Революцияның айқын жолында ешқандай кедергі болмайды. Жүйенің зияткер құрылымы ең қысқа мерзімде өзін қайта құру мүмкіндігіне ие”, — деді.












