Мемлекет басшысы Қасым-Жомарт Тоқаев 1 қыркүйекте жолдаған Жолдауында әр саладағы маңызды мәселелерді көтерді.
Аймақтар әлеуетіне көп көңіл бөлінді. Қазақстанда АЭС салу мәселесі және жаңадан екі министрлік құрылатынын, ең төменгі еңбекақы мөлшері көбейтілетінін, экономикаға өзгерістер қажет екенін және басқа да мәселелерді айтты. Ал бұл жөнінде сарапшылар не дейді? Бұл жөнінде сараптап көрсек.
Президент Жолдауы туралы өз ойын ортаға салған экономика шолушысы Мақсат Халық Президент Қасым-Жомарт Тоқаевтың «Әділетті Қазақстанның экономикалық бағдары» атты Жолдауында бір мәселеге ерекше көңіл бөлінгенін айтады.
Сарапшы: «Президент ақша-несие саясатындағы күрделі мәселені атап өтті. Елімізде банктер табысқа қол жеткізген. Өткен жылдағы табысы 1,5 трлн теңге. Олар қалай көп табысқа жетеді? Халықты несиелеу арқылы ма? Экономикаға қосар үлесі қандай? Тұтынушы несиесін көбейтсе, неге бизнесті қаржыландырмайды? Осындай мәселелер нақты айтылды»,-дейді.
Қасым-Жомарт Тоқаев Жолдауында «шикізат үшін шетке жалтақтамай, елдің өнеркәсіптік негізін қалыптастыру керек»,- деді. Президент өндірістің барлық сатысын елде дамытуды қамтамасыз етуді тапсырды.
Әлеуметтанушы Айсұлу Молдабек: «Жолдаудың басым бағыты экономикаға бағытталғанымен, барлық экономикалық іс-шаралардың нәтижесі халықтың жағдайына тікелей әсер етуі тиіс. Жолдауда айтылған халықтың әлеуметтік тұрмысы, соның ішінде жұмыссыздық мәселесі көбірек шешім тапса дейміз. Әсіресе бұл аймақтар үшін маңызды», – деді.
Ел әлеуеті айқын көрінетін әлеуметтік салаға келгенде, Мемлекет басшысы балалар мен жастарға айрықша тоқталды. Бастапқы білім беру капиталы мен жыл сайынғы мемлекеттік сыйақы және инвестициялық табыстың түбегейлі қаралуын міндеттеді.
Жолдауда айтылған көп міндеттің ішінде «Отбасы банк» қызметін қайта қарау, басты назарды аудандар мен моно-қалаларға, ауылдарға аудару бар. Сондай-ақ ел ішіндегі 21 банктің қатарына бәсекені арттыру үшін сенімді деген үш шетелдік қаржы ұйымын тарту ұсынылды. Президент аталған міндеттің бәрі үш жыл ішінде жүзеге асуын міндеттеді.
Сондай-ақ, Ы.Алтынсарин атындағы Арқалық педагогикалық институтының басқарма төрағасы–ректоры Ержан Әмірбекұлы Президенттің халыққа арнаған Жолдауына қатысты пікірін білдірді. «Жолдауда еліміздің таяу болашақтағы дамуының негізгі бағыттары көрсетілген. Баяндамада мемлекеттің жағдайына, сыртқы және ішкі саясатының негізгі бағыттары мен перспективаларына талдау жасалды. Елдің жаңа экономикалық бағытының айқындаушы принциптері әділеттілік, инклюзивтілік және прагматизм болмақ. Біз ұзақ мерзімді мақсат қоюдан бас тартуымыз керек. Өткен қателіктерге жол бермеу керек», — дейді сарапшы.
Күні кеше елімізде су ресурстары саласындағы қордаланған мәселелерді шешумен дербес министрлік айналысатыны белгілі болды. Бұл туралы да Президент Қасым-Жомарт Тоқаевтың Қазақстан халқына Жолдауында айтылды.
Сарапшы Азаматхан Әміртай су дипломатиясы бойынша жұмысты күшейту керек деп есептейді.
Жаңадан құрылатын ведомство жөнінде сарапшы: «Бұл министрлік міндетті түрде керек. Себебі су дипломатиясы деген бар. Су мәселесі көршілес елдермен тек қана дипломатиялық жолмен шешіледі. Қазақстанда судың негізгі көлемі көрші елдерден келеді. Сондықтан бұл мәселе геосаясатты, дипломатияны қажет етеді», – дейді.
Жалпы, Мемлекет басшысының Жолдауында еліміздің алдағы әлеуметтік-экономикалық дамуының басым бағыттары туралы айтылды. Қасым-Жомарт Тоқаев еліміздің дамуының жаңа міндеттерін айқындап берді.
Ел Президентінің бұл Жолдауы халқымыздың әлеуметтік-экономикалық жағдайын жақсартуға, шетелдік инвесторлардың жауапкершіліктерін арттыруға, адам өмірінің қауіпсіздігін қорғауға, қоғамдағы түйіткілді мәселелерді дер кезінде шешуге, халықтың мүддесін жақсартуға бағытталған.
Олай болса, еліміздің жарқын болашағы мен кемел келешегі үшін Жолдауда көрсетілген міндеттерді орындау – әр азаматтың борышы. Мемлекет басшысы халықтың көкейінде жүрген бірқатар мәселелерді көтеріп, оларды шешу бойынша нақты тапсырмалар берді. Ендігі кезекте тек жұмыс жасау қажет.



















