БҰҰ-ның 2 мамырда жарияланған есебіне сәйкес, Газа секторындағы инфрақұрылымды қалпына келтіру 80 жылға созылуы мүмкін.
Еуразия Тудейдің хабарлауы бойынша, жеті айға жуық уақытқа созылған Израильдің шабуылы миллиардтаған долларға шығын келтіріп, Газа секторындағы көптеген ғимараттарды қираған үйінділерге айналдырды.
Деректер Израильдің шабуылдарынан шамамен 80 мың үй қирағанын көрсетеді.
БҰҰ-ның Даму бағдарламасы жариялаған баяндамада «Газа секторында барлық қираған тұрғын үйлерді қалпына келтіру үшін шамамен 80 жыл қажет» делінген.
Сондай-ақ баяндамада егер құрылыс материалдары 2021 жылғы соңғы дағдарысқа қарағанда бес есе жылдам жеткізілсе, инфрақұрылымды қалпына келтіру 2040 жылға қарай жасалуы мүмкін екендігі айтылады.
БҰҰ-ның Даму бағдарламасының талдауы қазіргі қақтығыстың ұзақтығына негізделген соғыстың әлеуметтік-экономикалық салдарларының бірқатар болжамдарын қамтиды.
Бұған дейін Еуроодақтың сыртқы саясат жөніндегі басшысы Дүниежүзілік банк пен БҰҰ-ның бағалау нәтижелерін ұсынған болатын. Ол Газа секторының инфрақұрылымын қалпына келтіру құны 90 миллиард долларды (84 миллиард еуро) құрайтынын атап: «Біз инфрақұрылымның 60 пайыздан астамы бүлінген және 35 пайызыы толығымен жойылған деп айта аламыз», — деді.
БҰҰ Даму бағдарламасының әкімшісі Ахим Штайнер: «Адам шығынының ауқымы, капиталдың жойылуы және кедейліктің күрт өсуі қысқа уақыт ішінде келешек ұрпақтың болашағына қауіп төндіретін күрделі даму дағдарысына әкеледі», — деді мәлімдемесінде.
Болжамдарға сүйенсек, Газа секторындағы соғыс тоғыз айға созылған жағдайда, кедейлік деңгейі 38,8 пайыздан 60,7 пайызға дейін артады.



















