Numbeo сервисі әлемдегі қалалардың жайлылық рейтингісін анықтады. Порталдың рейтингі бойынша, 2023 жылы тамызда нидерландтық Гаага әлемдегі өмір сүру үшін ең жайлы қала ретінде танылды.
Numbeo сервисі мәліметтерді нақты уақыт тәртіптемесінде жаңартып отырады. Порталдың рейтингі бойынша 215,9 ұпай жинаған Гаага бірінші орынға шықты.
Екінші орынды Нидерландтың тағы бір қаласы — Роттердам иеленді, үздік үштікке Люксембург кірді.
Сосын Валенсия, Амстердам, Вена, Хельсинки, Мадрид, Копенгаген және Рейкьявик үздіктер тізімін ары қарай жалғастырады.
Қазақстан қалаларынан бұл тізімге тек бір ғана Алматы қаласы енген. Алматы жайлылық рейтингінде 85,1 ұпаймен 179-орынға табан тіреген.
Рейтинг соңында Нигерияның Лагос және Филиппиннің Маниласы тұр, олардағы жайлылық индексі 50-ден төмен.
Анықтама: Гаага-тарихы бай қала өзінің ерекшелігімен және әр түрлі тарихи дәуірлердің тоғысуымен тартады. Гаага, оның көрікті жерлері бүкіл әлемге әйгілі. Гаагада БҰҰ халықаралық соты, Халықаралық қылмыстық сот, Халықаралық арбитражды соты секілді ірі халықаралық құқықтық органдар орналасқан.
Гаага Амстердам мен Роттердамнан кейін Нидерланд қалалары арасында көлемі жөнінен үшінші орында тұр. Қаланың негізі 1230 жылы қаланған.


















