2024 жылы Сауд Арабиясының астанасында алғаш рет UFC турнирі өткізу жоспарланып отыр.
Промоутерлік ұйым мен Сауд Арабиясының бас ойын-сауық басқармасы осындай келісімге келді.
UFC өзінің алғашқы турнирін Сауд Арабиясында 2024 жылдың 2 наурызында ел астанасы Эр-Риядтағы Kingdom Arena-да ұйымдастыратын болды.
UFC турнирі жөнінде Сауд Арабиясындағы ойын-сауық істері Бас басқармасының төрағасы Турки Әл аш-Шейх әлеуметтік желіде «Турнир Сауд Арабиясы Корольдігінде алғашқы рет ұйымдастырылады. Бұл Эр-Рияд маусымы аясындағы тарихи кеш», — деп жазды.
Турнирдің тағы бір ерекшелігі – оны көруге билет сатылмауы мүмкін. Турнир UFC Fight Night деңгейінде ұйымдастырылады.
Айта кетсек, соңғы уақытта араб елдерінде, оның ішінде Сауд Арабиясында MMA спортына қызығушылық артып келеді. Дегенмен, UFC араб елдерінің турнирлерін тек Біріккен Араб Әмірліктерінде ғана өткізіп келген болатын.
2016 жылдан бері Сауд Арабиясы елде гольф, футбол, Формула-1, бокс, баскетбол, крикетті дамытуға қомақты инвестиция салып келсе, енді аралас жекпе-жекке қолдау көрсете бастады.
Биылғы тамызда Сауд Арабиясының Sports Investments инвестициялық қоры құрылып, ол америкалық Professional Fighters League (PFL) ұйымының миноритарлы үлесі 100 миллион АҚШ долларына сатып алды. Бұл MMA спортының тарихындағы қомақты инвестициялардың бірі.



















