Мысыр Сыртқы істер министрі Самех Шукри жер үсті арқылы Газа секторына жіберілетін гуманитарлық көмек көлемін шұғыл түрде ұлғайтуды талап етті.
Arab News басылымының хабарлауы бойынша, Самех Шукри АҚШ салуды жоспарлап отырған уақытша порт құрылысы аяқталғанға дейін жер үсті дәліздері мен маршруттары арқылы Газа секторына жіберілетін гуманитарлық көмек көлемін арттыру қажеттігін мәлімдеді.
Шукридің айтуы бойынша, теңіз портының құрылысы екі айдан кейін аяқталады. Мысыр Сыртқы істер министрі осы екі ай ішінде тағы неше баланың көз жұматынына алаңдаушылық білдірді.
Соңғы апталарда Газа секторындағы дағдарысты жеңілдету үшін БАӘ, Мысыр, Бельгия және АҚШ әуе арқылы гуманитарлық көмек тастады. Ұшақтардан тасталған жүк арасында дәрі-дәрмек пен азық-түлік бар.
Газа Денсаулық сақтау министрлігінің мәліметінше, Израиль шабуылдарынан 31 270-тен астам палестиналық қаза тапты. Қаза тапқандардың үштен екісін әйелдер мен балалар құрайды.



















