Израиль Премьер-министрі Биньямин Нетаньяху мен өтпелі кезеңдегі Сирия Президенті Ахмед аш-Шараа атысты тоқтатуға келісті.
Еуразия Тудейдің хабарлауы бойынша, бұл туралы Дональд Трамптың Сирия істері бойынша арнайы Елшісі және Американың Түркиядағы Елшісі Томас Барак X әлеуметтік желісіндегі аккаунтында жазды.
Америкалық дипломат Нетаньяху мен Ахмед аш-Шарааның АҚШ-ның Мемлекеттік хатшысы Марко Рубионың қолдауымен бітімге келіскенін айтты. Оның айтуынша, Түркия, Иордания және көршілес елдер де бұл шешімді қолдады.
16 шілде күні Израиль қорғаныс армиясы Сирия астанасы Дамаскінің орталығында орналасқан Қорғаныс министрлігінің штаб-пәтеріне әуеден соққы беріп, Сирия Президентінің сарайына шабуыл жасады.
Кейін Сирия билігі әскери друз топтарымен Сирияның оңтүстігіндегі соғыс қимылдарын тоқтату туралы келісімге келді.



















