Америка Құрама Штаттарының Дүниежүзілік денсаулық сақтау ұйымынан (ДДСҰ) шығу үдерісі толық аяқталды.
Еуразия Тудейдің Анадолу агенттігіне сілтеме жасап хабарлауы бойынша, бұл туралы Америка Құрама Штаттарының Денсаулық сақтау және әлеуметтік қорғау министрлігі мәлімдеді.
Президент Дональд Трамптың Дүниежүзілік денсаулық сақтау ұйымынан шығу туралы шешімінен бір жыл өткен соң Вашингтонның ұйымдағы 78 жылдық мүшелігі ресми түрде тоқтатылды.
Мәлімдемеге сәйкес, Америка Құрама Штаттарының ұйымға салатын барлық жарнасы тоқтатылып, ДДСҰ құрылымдарында жұмыс істеген америкалық мамандар кері шақыртылды.
Сарапшылар Америка Құрама Штаттары өзге елдердегі індеттер туралы жедел ескерту жүйесінен және маңызды медициналық мәліметтерден ажырап қалуы мүмкін екенін айтып, Вашингтонның Дүниежүзілік денсаулық сақтау ұйымынан шығуының зардабы ауыр болатынын ескертті.
Ресми деректерге сәйкес, АҚШ жыл сайын ұйымға міндетті жарна ретінде шамамен 111 млн доллар және ерікті көмек түрінде шамамен 570 млн доллар аударып келген.
ДДСҰ маймыл шешегі, Эбола және полиомиелит сияқты жаһандық денсаулыққа қауіп төндіретін індеттерге қарсы халықаралық іс-қимылды үйлестіріп, кедей елдерге техникалық көмек көрсетіп, вакциналар мен дәрі-дәрмектерді бөлуге жәрдемдеседі.
Мамандардың айтуы бойынша, АҚШ-тың ұйымнан шығуы полиомиелитті жою, ана мен бала денсаулығын қорғау, сондай-ақ жаңа вирустарды анықтау жөніндегі жаһандық бағдарламаларға едәуір соққы болуы мүмкін.
Айта кетейік, Дональд Трамп Дүниежүзілік денсаулық сақтау ұйымынан шығу туралы жарлыққа былтыр қаңтарда қол қойды. Жарлық тек бір жылдан кейін күшіне енді.


















