Қорғаныс және Ұлттық қауіпсіздік жөніндегі сарапшы Харрисон Касс The National Interest басылымында жарияланған мақаласында АҚШ өз әскеріне тым көп ақша жұмсайтыны және бұл шығындарды азайту орынды екенін жазды.
IRNA агенттігінің Sputnik агенттігіне сілтеме жасап хабарлауы бойынша, сарапшы АҚШ-тың қорғаныс бюджетінде бұрын-соңды болмаған Конгресс мақұлдаған 95 миллиард долларлық шетелдік көмек пакеті назар аударарлық әрекет екенін атады.
Бұл қаржының тым көп екенін тілге тиек еткен сарапшы АҚШ өз қарулы күштеріне тым көп ақша жұмсайтынына тоқталып, салыстырмалы түрде мысалдар келтірді.
«АҚШ қорғаныс саласына жылына 900 миллиард қаражат жұмсайды. Бұл ретте Қытай қорғаныс саласына жылына 300 миллиардтан аз қаражат жұмсаса, Ресей бұл мақсаттарға жылына 90 миллиардтан аз қаражат жұмсайды.
Жер бетіндегі 200-ден астам елдің ешқайсысы қорғаныс шығындары бойынша АҚШ жұмсайтын қаржыны жұмсамайды», — делінген мақалада.
«Иә, АҚШ әлемдегі ең қабілетті қарулы күштерге ие. Иә, Вашингтон бірден бірнеше ұрыс алаңына әскерлерін орналастыруға қабілетті. Бірақ Вашингтон қажет болған жағдайда Қытайды Үнді — Тынық мұхиты аймағында тек қатыгез күшпен ұстай ала ма? Қытай мен Ресейге бір мезгілде қарсы тұра ала ма?» деген сұрақтар төңірегінде сарапшы мақаласында жауап берді.
Харрисон Касс «Одан да көп ақша жұмсау жауапсыз және ағымдағы шығындар деңгейі әлі де тұрақсыз болғандықтан, шығындарды азайту ең қолайлы нұсқа болып табылады»,-дейді.
«Кез-келген армияның басты міндеті-өз азаматтарының қауіпсіздігін қамтамасыз ету. АҚШ-тың кең және қолайлы географиясы бар, бұл олардың қауіпсіздігін қамтамасыз етеді және американдық әскерилер бұл тапсырманы орындау үшін аз күш жұмсайды. АҚШ орасан зор энергетикалық ресурстарға бай», — деп жазады автор.
Харрисон Касс мақаласында америкалық ресурстардың шексіз емес екеніне тоқталып, денсаулық сақтау, білім беру, нашақорлықпен күресу және баспанасыздықпен күресу сияқты басқа салаларға да басымдық беруі керек екенін атап өтеді. Сарапшының пікірінше, әскери бюджетті қысқарту орынды нұсқа.
Сарапшы өзі тұратын қаланы мысал ретінде келтіре «Біздің жылдық бюджетіміз 7 миллиард долларды құрайды. Бұл жеткіліксіз. Біздің қала баспанасыздық пен қылмыстан зардап шегуде, жолдар ретсіз, өрт сөндірушілер мен полиция қаржыландырылмаған. Әскери бюджетке жұмсалған 850 миллиард доллардың 1 миллиарды ғана біздің қаламыздың жағдайын күрт жақсартар еді», — дейді сарапшы.


















