Аргентина Украинаға әскери көмек көрсетпейтінін және қақтығысқа араласпайтынын мәлімдеді.
Еуразия Тудейдің ТАСС агенттігіне сілтеме жасап хабарлауы бойынша, бұл туралы Аргентина президентінің баспасөз хатшысы Мануэль Адорни баспасөз мәслихатында мәлімдеді.
Мануэль Адорни: «Біз Украинаға ешқандай әскери көмек көрсетпейміз. Біз тек гуманитарлық көмек, логистика және аумақты миналардан тазартуға көмектесеміз. Бірақ әскери қақтығысқа араласпаймыз», — деді.
Адорни Аргентинаның бұл әрекетін Ресейге қарсы дұшпандық көзқарас деп санауға болмайтынын тілге тиек етіп: «Менің ойымша, дұшпандық әрекеттер қару-жарақ жіберу және әскери қақтығыстарға қатысу болып табылады», -деп баса айтты.
13 маусым күні Пентагон басшысы Ллойд Остин Аргентина Украинаның қорғаныс жөніндегі байланыс тобына қосылғанын хабарлады. Ал, 14 маусымда Ресейдің Буэнос-Айрестегі елшісі Дмитрий Феоктистов Аргентина Киевке әскери ұшақтар бермеуге уәде бергенін айтты.



















