Бүгін, 24 тамызда Мемлекет басшысы Қасым-Жомарт Тоқаев БРИКС саммитіне қатысады. Бұл туралы Ақорда Telegram-дағы ресми арнасында хабарлады, деп жазады ақпарат тілшісі.
Оңтүстік Африка Республикасының президенті Сирила Рамафосаның шақыруымен Қасым-Жомарт Тоқаев XV БРИКС саммиті аясында Йоханнесбургте өтетін мемлекеттер басшыларының «БРИКС плюс» диалогы отырысына бейнебайланыс арқылы қатысады.
Ақорданың мәліметінше, жиында Қасым-Жомарт Тоқаев Шанхай ынтымақтастық ұйымының қазіргі төрағасы ретінде сөз сөйлейді.
Айта кетсек, Бразилия, Ресей, Үндістан, Қытай және Оңтүстік Африка – 22-24 тамыз аралығында Йоханнесбургте мемлекет және үкімет басшыларының 15-ші саммитін өткізеді.
Қазақстанның БРИКС-ке қосылуға өтініш бергені мамыр айында белгілі болды. Сол кезде Bloomberg агенттігі Оңтүстік Африка СІМ-нің Азия және БРИКС жөніндегі елшісі Анила Суклалаға сілтеме жасай отырып хабарлағандай, бұл топқа Қазақстанмен бірге Алжир, Аргентина, Ауғанстан, Бангладеш, Бахрейн, Беларусь, Венесуэла, Египет, Зимбабве, Индонезия, Иран, Мексика, Нигерия, Никарагуа, БАӘ, Пәкістан, Сауд Арабиясы, Сенегал, Сирия, Судан, Тайланд, Тунис, Түркия, және Уругвай елдер кіруге талпынып жатыр.



















