Қазақстан Республикасы Тайваньда өткен сайлауға байланысты «бір Қытай» қағидатын табанды түрде қолдайтынын қайта мәлімдеді.
Қазақстан Республикасы Сыртқы істер министрлігі Тайваньдағы сайлау қорытындыларына түсініктеме жариялады.
Осы мәліметке сәйкес, Қазақстан СІМ мәлімдемесінде: «Тайваньда өткен сайлауға байланысты Қазақстан Республикасы «бір Қытай» қағидатын табанды түрде қолдайтынын қайта мәлімдейді және Қытай Халық Республикасының үкіметі бүкіл Қытайды білдіретін жалғыз заңды үкімет, ал Тайвань Қытай аумағының ажырамас бөлігі екенін растайды. Қытай Халық Республикасы үкіметінің елді бейбіт жолмен біріктіру жолындағы күш-жігерін қолдаймыз» деп жазылған.
Айта кетейік, 2024 жылдың 13 қаңтарында Тайваньда президенттік сайлау мен парламенттік сайлау бір мезгілде өтті.
Сайлауға Тайвань партияларынан үш үміткер қатысып, шамамен 41 пайыз дауыс алған Тайваньның қазіргі вице-президенті, Демократиялық прогрессивті партия үміткері Лай Циндэ жеңіске жетті.



















