Астанада Пандемия қорының гранты ресми түрде іске қосылды.
Денсаулық сақтау министрлігінің хабарлауы бойынша Астанада Қазақстан Республикасы Денсаулық сақтау министрлігінің, БҰҰ-ның ҚР-дағы тұрақты үйлестірушісі Микаэль Фриберг-Сторидің, ДДҰ-ның Қазақстандағы өкілі доктор Скендер Сыланың, Пандемия қорының атқарушы директоры Прия Басудың және дипломатиялық миссиялар өкілдерінің қатысуымен Пандемия қорының гранты ресми түрде іске қосылды.
Пандемия қорының қаражаты елдің денсаулық сақтау жүйесінің эпидемиологиялық қадағалау, шекаралық бақылау, зертханалық қауіпсіздік, ерте анықтау және ден қою, сондай-ақ персоналды оқыту саласындағы міндеттерін шешуге бағытталады.
ДДҰ-ның Қазақстандағы елдік офисі осы гранттың елде іске асырылуын үйлестіріп, Қазақстан Республикасы Денсаулық сақтау министрлігіне жалпы техникалық қолдауды қамтамасыз етеді.
Қазақстан ДДҰ Еуропалық өңірінің 36 елінің біріне айналып, нәтижесінде үш жыл мерзімге 19 млн. АҚШ доллары сомасына елдік грант және 27 млн. АҚШ доллары сомасына көп елдік грант алды.
The World Bank мәліметіне сәйкес, 2023 жылы қыркүйектің 12 күні Пандемия қорының Басқарушылар кеңесі алты аймақтағы 37 елде болашақ пандемияға төзімділікті арттыру үшін қаржыландырудың бірінші кезеңінде гранттарды мақұлдады. Таңдалған 19 жоба ауруды қадағалау мен ерте хабарлау, зертханалық жүйелер мен денсаулық сақтау қызметкерлерін күшейту үшін қаржы алады.
Пандемия қоры – хатшылығы Дүниежүзілік банкте орналасқан жаһандық көпжақты серіктестік.













