Әзербайжан астанасы Бакуде Түркі мемлекеттері ұйымы Ақсақалдар кеңесінің 18-отырысы өтті.
Еуразия Тудейдің хабарлауы бойынша, іс-шараға Ақсақалдар кеңесінің төрағасы Бинали Йылдырым, Әзербайжанның ақсақалы Хасан Гасанов, Солтүстік Кипр Түрік Республикасы, Қазақстан, Қырғызстан, Өзбекстан өкілдері және Түркі мемлекеттері ұйымы Бас хатшысының орынбасары Өмер Кочаман қатысты.
Кездесуде Түркі мемлекеттері ұйымының саяси, экономикалық, мәдени, білім беру, көлік, туризм және басқа да салалардағы болашақ қызметінің бағыттары талқыланды. Сонымен қатар, шараға қатысушылар Бакуде 1926 жылы өткен түркітанушылар конгресінің 100 жылдығына дайындық барысы мен түркі халықтарының ортақ тарихы оқулығының әзірленуін қарастырды.
Ақсақалдар кеңесінің төрағасы Бинали Йылдырым кеңестің қызметі түркі мемлекеттері басшылары тарапынан жоғары бағаланатынын атап айтты.
Ол кеңес бастамасымен қолға алынған ортақ түркі әліпбиі мен ортақ түркі тарихын әзірлеу жөніндегі бастамалардың маңыздылығын қуаттап: “Бұл жобалар ортақ мәдени мұрамызды және түркі әлемінің зияткерлік бірлігін нығайту жолындағы маңызды қадамдар болып табылады.
Түркі Академиясының ауқымды еңбегінің нәтижесінде 34 әріптен тұратын ортақ түркі әліпбиі бойынша кең ауқымды келісімге қол жеткізілді. Бұл келісім мәдени бірегейлігімізді нығайтудағы тарихи белес. Қазір “Түркі халықтарының ортақ тарихы” атты екі томдық еңбек дайындалуда. Ол ортақ әліпби туралы қол жеткізілген келісім негізінде барлық түркі тілдерінде жарық көреді”, – деді.



















