Қасым-Жомарт Тоқаев пен Эммануэль Макронның Астанадағы кездесуі туралы мақала француздың әйгілі Лессансьéль журналының кезекті шығарылымында жарияланды.
«Халықаралық қатынастағы маңызды құндылық» деген атаумен жарияланған мақалада Макронның Қазақстанға ресми сапары мен екі елдің даму мүмкіндіктері жазылған. Автор белгілі саясаткерлердің пікірлерін де сарапқа салған.
«Француз бұқаралық ақпарат құралының Қазақстанға қызығушылық танытуы бекер емес. Олардың тараптар арасындағы қатынасты талқылауы, екі елдің мүмкіндіктерін арттыра түскендей. Тағы да атап өткім келеді, бұл сапар Франция мен Еуропаның неліктен Орталық Азиямен байланыс орнатуға ниетті екенін ұғындырды. Экономикалық бағыттағы дипломатиялық сапар деуге болады. Енді мәдениет саласы бойынша қатынасты нығайту керек», — деді Еуропадағы талдау және қауіпсіздік институтының президенті Эммануэль Дюпюи.
Еске сала кетсек, 1 қарашада Франция президенті Эммануэль Макрон Қазақстанға ресми сапармен келді. Сапар барысында Қасым-Жомарт Тоқаев пен Эммануэль Макрон сауда-экономикалық, инвестициялық және энергетикалық ынтымақтастықты нығайту бойынша келіссөздер жүргізді, сондай-ақ халықаралық және өңірлік күн тәртібіндегі мәселелерді талқылады.



















