ХАМАС қазіргі таңда палестиналық топтармен атысты тоқтату туралы ұсыныс бойынша кеңесіп, соны қарастырып жатыр.
Еуразия Тудейдің Al Jazeera агенттігіне сілтеме жасап хабарлауы бойынша, бұл туралы ХАМАС-тың Telegram мессенджерінде жасаған қысқаша мәлімдемесінде айтылды.
Мәлімдемеде: “Біз сионистік басқыншылықты тоқтату және гуманитарлық көмектің еркін кіруін қамтамасыз ету жөніндегі міндеттемелеріміздің бөлігі ретінде палестиналық әртүрлі топтардың жетекшілерімен делдал ұсыныс бойынша кеңесіп жатырмыз.
ХАМАС осы кеңесулерден кейін өзінің соңғы шешімін делдал елдермен бөлісіп, ресми мәлімдеме жасайды”, -деді.
Бұл ретте Израиль Премьер-министрі Биньямин Нетаньяху Израильдің атысты тоқтату туралы келісімге дайын екенін, бұл мәселе бойынша соңғы шешімді ХАМАС қозғалысы қабылдауы керек екенін айтты.
Yedioth Ahronoth басылымы бұл келісім палестиналық тұтқындарды босату үшін кепілге алынған 20 адамның 10-ын, сондай-ақ, қаза тапқан 30 адамның 18-ін босатуды қамтитынын жазды.
Басылымның мәліметінше, 60 күндік атысты тоқтату кезінде тірі қалғандарды да, қаза тапқандарды да босату бес кезеңде жүзеге асырылады.
Сонымен қатар, Израильдің лауазымы жоғары тұлғасының айтуынша, ұсынылған келісімде Израиль әскерлерінің Газадан шығарылуы және аумаққа гуманитарлық көмектің айтарлықтай артуы қамтылған 60 күндік атысты тоқтату қарастырылған.
Associated Press агенттігінің хабарлауынша, атысты тоқтату жоспары ХАМАС қозғалысының бірінші күні сегіз, соңғы күні екі, жалпы 10 адамды босатуды қамтиды. Оның орнына Израиль күштері Газаның белгілі бір аймақтарынан әскерлерін шығарып, гуманитарлық көмек дереу аумаққа жеткізіледі.
Аты-жөнін атамауды өтінген Мысырдың лауазымы жоғары тұлғасының айтуынша, бұрын келісімге бөгет болған кедергілер, соның ішінде көмек тарату жолы да жойылған.
Сондай-ақ, ол делдал ел мен АҚШ қақтығысты тоқтату туралы келіссөз жүргізуге кепілдік беретінін, алайда Израиль қолданыстағы келісім аясында бұл мәселе бойынша ешқандай міндеттеме алмағанын айтты.



















