ХАМАС тобының өкілі Сами Әбу Зухри АҚШ Президенті Дональд Трамптың 15 ақпанға дейін кепілге алынғандарды босату туралы үзілді-кесілді талабына жауап беріп, қоқан-лоққы тілін қолданудың еш құндылығы жоқ екенін айтты.
Еуразия Тудейдің хабарлауы бойынша, Әбу Зухри Трамптың Газа секторын “тозаққа” айналдыру туралы қоқан-лоққыларына жауап беріп: “Қоқан-лоққы тілін қолданудың ешқандай құны жоқ, тек жағдайды қиындатады”, — деді.
Сами Әбу Зухри ХАМАС қозғалысының Израильмен бұрын қол жеткізілген келісімдерді ұстануға ниетті екенін айтып: “Қолданыстағы келісімді екі тарап та сақтауы керек. Бұл кепілге алынғандарды қайтарудың жалғыз жолы”, — деді.
Еске сала кетейік, Трамп ХАМАС егер 15 ақпан, сенбі күні сағат 12:00-ге дейін кепілге алынғандарды қайтармаса, Газа секторында тозақтың қақпасы ашылатынын айтты.



















