Иордания БҰҰ және Мысырмен бірлесіп, 11 маусымда Газа секторында гуманитарлық көмекті жандандыру үшін халықаралық конференция өткізеді.
Еуразия Тудейдің Petra ақпарат агенттігіне сілтеме жасап хабарлауынша, Өлі теңіздегі Король Хусейн бен Талал атындағы конференция орталығында өтетін «Әрекетке шақыру» атты конференцияда мемлекеттер мен үкіметтердің басшылары, сондай-ақ, халықаралық гуманитарлық ұйымдардың жетекшілері бас қосады.
Іс-шара Газа секторындағы гуманитарлық апатқа халықаралық қауымдастық реакциясын белсендіру жолдарын анықтауға бағытталған.
Бұл жөнінде БҰҰ-ның гуманитарлық істерді үйлестіру кеңсесінің өкілі Йенс Лаерке гуманитарлық көмектің газалықтарға жетпейтінін, бұл күрделі мәселе екенін мәлімдеді.
Йенс Лаеркенің айтуынша, гуманитарлық қызметкерлер мұқтаж жандарға гуманитарлық көмекті жеткізуде өту аймақтарынан кедергілерге тап болуда.
БҰҰ-ның гуманитарлық істерді үйлестіру кеңсесінің өкілі: «Бізге гуманитарлық көмек жеткізу үшін жер үсті өткелдері көбірек қажет және олар қауіпсіз болуы керек», — деді.
24 мамыр күні Халықаралық сот Израильге Газа секторының оңтүстігіндегі Рафахтағы әскери операциясын тоқтатуға бұйрық беріп, гуманитарлық көмектің Газа секторына енуіне мүмкіндік беру үшін Рафах бақылау-өткізу пунктінің жұмысын қайта бастауға шақырды.
Оңтүстік Африканың өтініші бойынша шығарылған шешім 13 оң және 2 қарсы дауыспен қабылданды.
Бүгінде Газа секторында Израиль шабуылдарынан қаза тапқан палестиналықтардың саны 36 мыңнан, ал жарақат алғандар саны 82,6 мыңнан асқаны белгілі болды.



















