Ирак премьер-министрі Әли әз-Зейди елде «Telegram» мессенджерін бұғаттады.
Еуразия Тудейдің Ирактың ақпарат агенттігі ВАА-на сілтеме жасап хабарлауынша, Ирактың БАҚ және байланыс басқармасы ел премьер-министрі Әли әз-Зейдидің бұйрығы негізінде ұлттық қауіпсіздікті қорғау және заңға қайшы контентке қарсы күрес мақсатында Telegram мессенджерін бұғаттау туралы шешім қабылданғанын мәлімдеді.
Басқарманың хабарлауынша, бұл қадамның мақсаты — Telegram компаниясын осы қосымша арқылы жарияланатын ирактық контентті қайта қарауға және заң бұзушылықтар мен теріс пайдаланудың алдын алу үшін қажет шаралар қабылдауға міндеттеу. Осыған байланысты Telegram компаниясына өз құқықтық мәртебесін реттеу үшін 30 күн мерзім берілді.
Мұның алдында да биыл сәуір айында Иракта Telegram қызметіне тыйым салынған болатын, алайда IraqiNews ақпарат порталының мәліметінше, бұл шектеу мамыр айында Telegram мен Ирактың қадағалау органдары арасында келіспеушіліктерді шешу жөніндегі келісімге қол жеткізілгеннен кейін жойылған болатын.
Бұл шешім Иордания да бүгін таңертең бүкіл ел аумағында Telegram-ды бұғаттайтынын жариялаған кезде қабылданып отыр. Иордания билігі бұл қадамның себебі ретінде қауіпсіздікке қатысты алаңдаушылықты, пайдаланушыларды қорғауды және виртуалды кеңістіктегі заңсыз әрекеттерге қарсы күресті атады.
Осылайша, Telegram бір күннің ішінде аймақтың екі елінде жаңа шектеулерге тап болды.












