Иран мен Оман өкілдері Тегеранда кездесіп, Ормұз бұғазы бойынша келіссөздер жүргізді.
Еуразия Тудейдің хабарлауы бойынша, Тегеран қаласында Иран мен Оман Сыртқы істер министрлерінің орынбасарлары деңгейінде өткен Ормұз бұғазы бойынша келіссөздер нәтижелі болып, белгілі бір ілгерілеушілікке қол жеткізілді.
Бұл туралы Иран Сыртқы істер министрлігінің ресми өкілі Исмаил Бақайи мәлімдеді.
Исмаил Бақайидың айтуы бойынша, Иран мен Оман Сыртқы істер министрлерінің орынбасарлары жұма және сенбі күндері өткен бірнеше кездесуде бұғаздағы кеме қатынасының қауіпсіздігін қамтамасыз етудің ортақ қағидаттары мен практикалық тетіктерін талқылады.
Сондай-ақ тараптар екі мемлекеттің егемендік құқықтарын сақтау мәселесіне баса назар аударған.
Иран Сыртқы істер министрлігінің ресми өкілі Ормұз бұғазындағы қазіргі жағдай әзірге өзгеріссіз қалып отырғанын баса айтты. Оның айтуы бойынша, Иран енгізген кеме қозғалысына қатысты шектеулер күшінде, ал АҚШ Иран порттарына қарсы блокадасын жалғастыруда.
Оман делегациясы сенбі күні кешке Тегераннан кеткенімен, тараптар арасындағы техникалық және саяси консультациялар әлі де жалғасып жатыр.
Айта кетейік, АҚШ президенті Дональд Трамп 8 шілде күні 18 маусымға қараған түні қол қойылған атысты тоқтату туралы келісімнің бұдан былай күшінде емес екенін мәлімдеді. Осыдан кейін АҚШ әскері Иран аумағына бірнеше мәрте соққы жасады. Вашингтон бұл әрекеттердің Иран Ислам Республикасының Ормұз бұғазы арқылы өткен сауда кемелеріне қарсы жасаған іс-қимылдарына жауап ретінде жүзеге асырылғанын мәлімдеді.
Бұған жауап ретінде Тегеран Таяу Шығыстағы бірнеше елде орналасқан америкалық әскери базаларға соққы жасап, Ормұз бұғазын жапты.


















