Израиль Газа секторын бомбалауда. Бұл жөнінде әлем елдері түрлі реакция білдірді.
Қытай Сыртқы істер министрі Ван И Палестинаға қарсы тарихи зұлымдықтың тоқтатылуы жөнінде айтып: «Тель-Авив Газаны бомбалауды тоқтатуы тиіс. Қытай Газада атысты тоқтату бітімін орнату туралы сөйлесу үшін жуырда Батыс Азияға делегация жібереді»,-деді.
Иордания Сыртқы істер министрі Айман әс-Сафади Израильдің қылмыстарын айыптап: «Израиль режимінің палестиналықтарды көшіру туралы шешімі – соғыс қылмысы»,-деп атады.
Ол Газа секторында гуманитарлық апат төніп тұрғанын мәлім етіп: «Халықаралық қауымдастық Израиль режимін айыптауы тиіс»,-деді.
БҰҰ-дағы Ресей өкілі Василий Небензя «Батыс Азия аймағы бұрын-соңғы болмаған гуманитарлық апат пен бір ауқымды соғыстың алдында тұр»,-деп ескертті.
Бұған дейін Ресей Президенті Владимир Путин де қазіргі Израиль мен Палестина арасындағы жағдайдың себебі – АҚШ-тың біржақты сәтсіз саясаты екендігін айтқан болатын. Путин Израильдің Газа секторын қоршауға алуын жабайылық деп атады.
Сонымен қатар ТМД елдерінің сыртқы істер министрлері жұма күні жариялаған бірлескен мәлімдемесінде Газа секторында көрініс бере бастаған гуманитарлық апатқа қатысты алаңдаушылық білдіріп, ол жаққа азық-түлік пен жанар-жағармай жеткізуге шақырған еді.



















