Иран Президенті Масуд Пезешкиан Ислам Республикасының ядролық бағдарлама, санкциялар, аймақтық және халықаралық жағдайлар мен жаһандық мәселелерге қатысты басты ұстанымдарын атады.
Еуразия Тудейдің хабарлауы бойынша, бұл туралы Президент Пезешкиан америкалық NBC телеарнасына берген сұхбатында мәлімдеді.
Пезешкиан Нью-Йорктегі Біріккен Ұлттар Ұйымы Бас Ассамблеясының 80-ші сессиясы аясындағы сапарының соңғы күнінде өткен бірқатар маңызды тақырыпқа тоқталды.
Масуд Пезешкиан ядролық келіссөзге қатысты “Иран ядролық нысандарына тексеру жүргізуге кедергі келтіріп отыр” деген айыптауды теріске шығарып: “Егер бізді ядролық нысандарымызды тексеруге жол бермеді деп айыптаса, Snapback механизмі іске қосылғаннан кейін олар бұл қолжетімділікті қалай күтеді? Бұл мүлде шындыққа жанаспайды. Біз халықаралық құқық пен Ядролық қаруды таратпау туралы шарт аясында мұндай тексерулерге рұқсат бердік және оны өзіміз де қаладық. Бірақ олар осы ережелерге сай әрекет еткісі келмеді”, — деді.
Пезешкиан Иран Атом қуаты жөніндегі халықаралық агенттікпен келісімді сақтауға дайын болғанын, алайда Америка бейбіт жолмен шешім табуға мүдделі болмағанын айтып: “Біз келісім аясында әрекет етуге дайын болдық. Бірақ Америка бұл бағыттың бейбіт жолмен дамуына мүдделі емес. Олар дәл осылай бұған дейін де “Ортақ қадам” жан-жақты бағдарламасын біржақты бұзды”,- деп баса айтты.
Иран Президенті қорғаныс және басқыншылық туралы: “Біз ешқашан және ешбір жағдайда соғысты бірінші болып бастамадық және бастамаймыз. Алайда, егер біреу бізге шабуыл жасаса, оған міндетті түрде жауап береміз. Біз қорғаныс әлеуетімізді күннен-күнге күшейтеміз”,- деді.
Сонымен қатар, Пезешкиан Газадағы жағдайға тоқталып: “Неліктен Газада күн сайын адамдарды бомбалап жатыр? Неге өзін ықпалды деп көрсететін халықаралық ұйымдар ештеңе істей алмай отыр? 65 мыңға жуық жазықсыз адам қаза тапты. Әйелдер мен балалар аштықтан өліп жатыр. Белгілі бір державалар қандай гуманитарлық немесе адам құқықтары нормаларына сай әлемнің кез келген нүктесін күнделікті бомбалай алады? Неге ешкім оларға тосқауыл бола алмайды?” — деді.
Иран Президенті сұхбатының соңында Америка Құрама Штаттарының халқына үндеу жолдап: “Америка халқы өз үкіметінің олардың салығынан жиналған қаржыны апартеид пен геноцид қылмыстарын қолдауға жұмсауына жол бермеуі тиіс”, — деді.


















