Өзбекстан Республикасының Президенті Шавкат Мирзиеев 23-25 қаңтарда Қытай Халық Республикасының Төрағасы Си Цзиньпиннің шақыруымен осы елге мемлекеттік сапармен барады.
Бұл туралы ӨР Президентінің баспасөз қызметі хабарлады.
Қытай Сыртқы істер министрлігінің баспасөз хатшысы Хуа Чуньин де Өзбекстан президенті Шавкат Мирзиеевтің 23-25 қаңтар аралығында Қытайға сапармен келетінін айтты.
Мирзиеевтің Бейжіңде болу бағдарламасына сәйкес жоғары деңгейдегі келіссөздер, сондай-ақ бірқатар екіжақты кездесулер өтеді.
Іс-шараның күн тәртібінде Өзбекстан-Қытай жан-жақты стратегиялық серіктестік қатынасын одан әрі нығайту және толық ауқымды практикалық ынтымақтастықты кеңейту мәселелері бар.
Өзбекстанның Мемлекет басшысы сондай-ақ Қытай өңірлерінің біріне барып, Қытайдың жетекші компаниялары мен банк-қаржы институттарының басшыларымен кездеседі.
Айта кетейік, Өзбекстан Республикасының Президенті Шавкат Мирзиеев Бейжіңге мұның алдында 2023 жылғы қазан айында зайыбымен бірге жұмыс сапарымен барған болатын.
Мирзиеев сапар барысында Қытай Халық Республикасының Төрағасы Си Цзиньпинмен келіссөз жүргізді.
Өзбекстан Президенті мен оның зайыбы «Бір белдеу, бір жол» үшінші халықаралық форумына келген делегация басшыларының салтанатты кездесуіне қатысты.
Қытай — Өзбекстанның жетекші сауда серіктесі.
Өзбекстан 2021 жылдың наурыз айынан бастап осы елген келетін Қытай азаматтарына 10 күнге дейін визасыз режим енгізді.



















