Оман сұлтаны Хайсам бин Тариқ Иран Президенті Ибраһим Раисидің ресми шақыруымен жоғары лауазымды делегацияны бастап жексенбі күні Теһранға келді.
Оман сұлтаны бірқатар министр мен жоғары лауазымды тұлғаларды бастап Иранға екікүндік сапармен келді.
Хайсам бин Тариқ сапар барысында Иран Президенті Ибраһим Раисимен кездесті.
Иран Президенті Иран мен Оманның жоғары лауазымды делегацияларының ортақ отырысында Иран мен Оман қарым-қатынасының сауда деңгейінен инвестиция салу деңгейіне жоғарылағанына тоқталып: «Екі ел басшыларының аймақтық интеграцияны нығайту туралы ортақ көзқарастары өзара тиімді әлеуеттермен қоса өзара қарым-қатынасты екіжақты және аймақтық деңгейде кеңейтуге септігін тигізіп отыр»,-деді.
Раиси сондай-ақ екі елдің Йемен мен Палестинаға қатысты ортақ ұстанымдарына тоқталып, Оман үкіметі, әсіресе сұлтан Хайсам бин Тариқтың Йемен мен Палестина халықтарының құқықтарының орындалуы үшін жасап жатқан талпыныстарына алғысын білдірді.
Оман сұлтаны да отырыста Иран Президентінің шақырып, жылы қарсы алғанына алғыс айтып: «Екі елдің өзара қарым-қатынас және аймақтық әріптестік деңгейі айтарлықтай жоғарылады. Өзара сауда айналымы 2 есе артса да, екі елдің алуан түрлі әлеуеттерін ескерсек, сауда көлемінің тиісті межесінен әлі алшақпыз. Осы әлеуеттерді пайдалануға көбірек күш салуымыз керек»,-деді.
Иранның кеден басқармасының мәліметінше, Иран мен Оман арасындағы сауда айналымы 2022 жылы 1 млрд 800 млн долларға жеткен. Соның ішінде Иран тауарларын Оманға экспорттау көлемі 1 млрд доллардан асты.



















