Ресей Президенті Владимир Путин Әзірбайжанға мемлекеттік сапармен барады. Еуразия Тудейдің Кремльдің баспасөз қызметіне сілтеме жасап хабарлауы бойынша, Путиннің сапары тамыздың 18-19 күндеріне жоспарланған.
Сапар барысында Ресей мен Әзірбайжан қарым-қатынасын одан әрі дамыту, елдердің стратегиялық әріптестігі мен одақтастығы, сондай-ақ, халықаралық және өңірлік өзекті мәселелер талқыланады.
Келіссөздер қорытындысы бойынша үкіметаралық және өзге де құжаттарға қол қою жоспарлануда.
Айта кетейік, бұған дейін Путин шілде айының басында Астанада ШЫҰ саммиті аясында әзірбайжандық әріптесі Илһам Алиевпен кездесті. Кездесуде Путин Ресей Федерациясы мен Әзірбайжанның сауда-экономикалық ынтымақтастығы оң дамып келе жатқанын, бірінші жартыжылдықта тауар айналымының өсуі 13 пайызды құрағанын айтты.
Путин соңғы рет Әзірбайжанға 2018 жылдың 27 қыркүйегінде барған. Бакуге жұмыс сапары аясында Ресей Президенті дзюдодан әлем чемпионатына қатысып, IX Ресей-Әзірбайжан аймақаралық форумының пленарлық отырысына қатысып, Илһам Әлиевпен кездесу өткізді.



















