Ресей Президенті Владимир Путин мен Иранның жаңа Жоғарғы көшбасшысы Моджтаба Хаменеидің биыл Тегеранда өтетін Каспий саммиті аясында кездесуі мүмкін.
Еуразия Тудейдің хабарлауы бойынша, бұл туралы Иранның Мәскеудегі елшісі Казем Джалали РИА Новости агенттігіне берген сұхбатында мәлімдеді.
Казем Джалали: «Әрине, мұның бәрін Америка Құрама Штаттары мен Израильдің Иранмен қазіргі қақтығысынан кейін қарастыру керек. Қалай болғанда да, біз Тегеранда Каспий саммиті өтетін күнді белгіледік. Саммит биыл өтеді. Егер саммит өтсе, онда әдеттегідей екіжақты кездесулер болады деп ойлаймын»,- деді.
Сондай-ақ елші Тегеранның Иранның бұрынғы Жоғарғы көшбасшысы Әли Хаменеидің қазасына байланысты көңіл айтқаны және жаңа Жоғарғы көшбасшы Моджтаба Хаменеиді құттықтағаны үшін Владимир Путинге ризашылық білдіретінін айтты.
Иран Президенті Масуд Пезешкиан 2025 жылдың желтоқсан айында Тегерандағы Каспий саммиті 2026 жылдың 12 тамызында өтетінін мәлімдеген болатын. Алайда ақпан айының соңында Таяу Шығыста Иран төңірегінде басталған қақтығыстың жалғасып жатқанына екінші апта болды. Соған қарамастан, Тегеран әскери іс-қимылдарға байланысты Каспий маңы мемлекеттері басшыларының кездесуін кейінге қалдыру немесе одан бас тарту туралы әзірге хабарлаған жоқ.



















