Кеше, 8 шілдеде Қазақстанда Орталық Азия елдерінің әскери жаттығулары басталды.
Еуразия Тудейдің Қазақстан Қорғаныс министрлігіне сілтеме жасап хабарлауы бойынша, оқу-жауынгерлік міндеттерді пысықтауға Әзірбайжан, Қазақстан, Қырғызстан, Тәжікстан және Өзбекстанның әскери контингенттері қатысуда. «Бірлестік-2024» әскери жаттығуы 8-17 шілде аралығында Маңғыстау облысындағы Оймаша полигонында, Тоқмақ мүйісінен екі шақырым жердегі теңіз учаскесінде өтуде.
Министрліктің мәліметінше, аталмыш шараға 4 мыңға жуық әскери қызметші мен 700-дей қару-жарақ пен әскери техника жұмылдырылған.
Қазақстан, Қырғызстан, Өзбекстан, Тәжікстан мен Әзірбайжан әскери жаттығу өткізуге биыл сәуір айында келіскен. Оқу-жаттығу аясында мәдени-демалыс және спорттық іс-шаралар өтеді. Әскери-қолданбалы спорт түрлері мен «Бағдар» тактикалық бағдарлау және армиялық тактикалық атыстар бойынша жарыстар да ұйымдастырылады.
Сарапшылар Орталық Азия елдерінің Әзірбайжанмен әскери жаттығу өткізетініне ерекше назар аударуда. Шетелдік басылымдар аталмыш жаттығу Мәскеудің алаңдатушылығын тудырды десе, Ресей басылымдары Каспий жағасындағы Ресей мен Иран бұл жаттығуға қатыспаса да, «бақылаушы» ретінде шақырылуы керектігін жазды.
Орталық Азия елдерін зерттеуші Брюс Панниердің айтуы бойынша, «Бірлестік-2024» жаттығуына қатысатын елдер ортақ қауіпсіздік мәселесін Ресей, Қытай, Иранның көмегінсіз шешу үшін ынтымақтасуды жөн көреді.



















