ҚХР Сыртқы істер министрлігінің ресми өкілі Мао Нин Иран мен АҚШ арасындағы шиеленістің күшеюі Батыс Азиядағы тепе-теңдікке қауіп төндіретінін айтып, екі елді диалогқа шақырды.
Еуразия Тудейдің хабарлауы бойынша, Қытай Сыртқы істер министрлігінің ресми өкілі Мао Нин Иран мен АҚШ арасындағы шиеленістің күшеюі Батыс Азиядағы тепе-теңдікке қауіп төндіретінін және өңірдегі бірде-бір мемлекеттің мүддесіне сай келмейтінін мәлімдеді.
Мао Ниннің айтуынша, кез келген келіспеушілік күш қолдану сценарийлері арқылы емес, саяси-дипломатиялық жолмен реттелуі тиіс.
Қытай Халық Республикасының Сыртқы істер министрлігінде өткен кезекті брифингте сөз сөйлеген дипломат Вашингтонда Иранға шектеулі әскери соққы жасау нұсқалары қарастырылып жатқаны туралы хабарламаларға пікір білдірді.
Ол Бейжің жағдайдың дамуын мұқият қадағалап отырғанын және барлық тарапты барынша ұстамдылыққа шақыратынын атап айтты.
Мао Нин қақтығыстың одан әрі милитаризациялануы тізбекті реакция туындатып, көрші мемлекеттерді дағдарысқа тартып, Парсы шығанағы арқылы өтетін энергетикалық және көлік дәліздерін тұрақсыздандыруы мүмкін екенін айтып: “Бұл аймақ әлемдік энергетиканың негізгі торабы болып қала береді. Ормуз бұғазы арқылы жаһандық мұнай мен газ жеткізілімінің едәуір бөлігі өтеді, сондықтан кез келген шиеленіс әлемдік нарықтарға бірден әсер етеді”, -деді.
Бейжіңнің ұстанымы дәстүрлі түрде араласпау және дауларды саяси жолмен реттеу қағидаттарына негізделеді.
Қытай Иранның ядролық бағдарламасы бойынша халықаралық келісім архитектурасын сақтауды қолдайды және көпжақты бақылау тетіктеріне қайта оралу қажеттігін бірнеше рет қуаттады.
Осы тұрғыда Бейжің “Ортақ қадам” жан-жақты ядролық бағдарламасы аясындағы келіссөздер форматын қалпына келтіруді қолдап, оны өңірлік қауіпсіздіктің маңызды элементі санайды.
Қытай Иранның ірі сауда серіктестерінің бірі болып қала береді, сонымен қатар АҚШ-пен күрделі, бірақ стратегиялық тұрғыдан маңызды қатынасты сақтап отыр.
Тегеран мен Вашингтон арасындағы текетірестің күшеюі тек өңірлік тұрақтылыққа ғана емес, сонымен бірге Батыс Азияда маңызды орын алатын “Бір белдеу — бір жол” бастамасын қоса алғанда, халықаралық экономикалық байланыстың кең жүйесіне қауіп төндіреді.

















