Қытай Тайваньның жаңа президентінің инаугурациясы өткеннен кейін аралға жақын жерде теңіз жаттығуларын бастады.
Еуразия Тудейдің Associated Press агенттігіне сілтеме жасап хабарлауы бойынша, Тайваньды өз аумағының бір бөлігі санайтын Бейжің аралға жақын жерде ауқымды әскери жаттығуларды бастады.
Қытай армиясының Шығыс жауынгерлік қолбасшылығы екі күндік құрлық, теңіз және әуе жаттығулары бейсенбі күні таңертең басталғанын мәлімдеді.
Қытай армиясының мәлімдемесінде: «Бұл жаттығу тәуелсіздікке ұмтылған сепаратистер үшін үлкен жаза, сондай-ақ араласушы және арандатушылық әрекеттер жасайтын шетелдік күштерге ескерту болып табылады», делінген.
Сонымен қатар мәлімдемеде жаттығу Қытай армиясының әскери-теңіз және әскери-әуе күштерінің мүмкіндіктері мен олардың негізгі мақсаттарға соққы беру қабілетін тексеруге бағытталғаны атап өтіледі.
Қытай әскери жаттығуды Тайвань бақылауындағы Цзиньмэнь, Маззу, Уцюю мен Дуньин аралдарының айналасындағы аудандарда өткізіп жатыр.
Тайвань Қорғаныс министрлігі Қытайдың бұл әрекетін аймақтық бейбітшілік пен қауіпсіздікке нұқсан келтіретін «арандатушылық» деп атады.
Қытай Тайваньның жаңа президенті Лай Циндэні сепаратист деп қарастырады. Дүйсенбі күні Лай Циндэ өзінің инаугурациясын өткізді. Бұған дейін АҚШ 20 мамырда Тайваньға өз делегациясын жіберетінін айтқан болатын.
АҚШ үкіметі Тайваньмен бейресми қарым-қатынаста болып, аралға қару-жарақ жеткізуіне байланысты АҚШ пен Қытай арасындағы шиеленіс күшейе түсті. Себебі, Бейжің Тайваньды өз аумағының бір бөлігі деп, бұл мәселеге Батыстың кез келген араласуын «егемендікті бұзу» деп санайды.
Бейжің Тайваньды елдің «ішкі» мәселесі деп санайды және шетелдік үкіметтерді бұл мәселеде араласпауға шақырады. Қытай шенеуніктері Вашингтонды Тайваньды қолдап, қорғаныс саласында келісімшарттар жасағаны және аралға қару жібергені үшін бірнеше рет сынға алды.


















