Иранның Әзербайжандағы бұрынғы елшісі Мохсен Пакайин Шанхай Ынтымақтастыық Ұйымы мәлімдемесінде Иранды қолдау мен біржақтылыққа қарсы тұруда бұрын-соңды болмаған ұстаным танытқанын баса айтты.
Еуразия Тудейдің хабарлауы бойынша Иранның Әзербайжандағы бұрынғы елшісі, тәжірибелі дипломат Мохсен Пакайин бұл туралы “Меһр” ақпарат агенттігіне берген сұхбатында мәлімдеді.
Пакайин Шанхай ынтымақтастық ұйымы саммитінің қорытынды мәлімдемесіне тоқталып, бұл құжат ұйымның бұрынғы мәлімдемелерінен өзгеше екенін және мүше мемлекеттердің тәуелсіздігін, сондай-ақ аймақтық және жаһандық дағдарыстарды шешуде тиімді рөл атқаруға деген ұмтылысын көрсететінін атап айтты.
Оның айтуынша, бұл мәлімдеме, ең алдымен, Иранның пайдасы үшін толық тиімді. Себебі құжатқа қол қойған барлық ел, тіпті АҚШ-пен стратегиялық қарым-қатынастағы Үндістанның өзі АҚШ-тың Иранға жасаған шабуылдары мен ШЫҰ мүшелеріне қарсы санкцияларын айыптап, Иранның егемендігі мен аумақтық тұтастығын қолдайтынын растаған.
Пакайиннің айтуы бойынша мәлімдемеде АҚШ-тың аты аталып, оның Иранға жасаған шабуылдары халықаралық құқық нормаларын бұзатыны және халықаралық бейбітшілік пен тұрақтылыққа қауіп төндіретіні айтылған. Бұл — ШЫҰ тарихында бұрын болмаған маңызды бетбұрыс.
Мәселелерді саяси-дипломатиялық жолмен шешуге шақыру Иранның дипломатия арқылы мәселені реттеу ұстанымын қуаттайды.
Құжат антисионистік сипатқа ие және Палестинаны ашық әрі айқын қолдайды.
ШЫҰ мүшелері біржақты экономикалық шектеулерге қарсы. Ұйым өз одақтастарын экономикалық қысымдар мен санкциялардан қорғауды өз құқығы санайды. Тарифтер енгізуге және санкциялар салуға қарсылық білдіру — қазіргі жағдайда жаңа әрі назар аударарлық ұстаным.
АҚШ Қаржы министрінің Иранмен ынтымақтасатын елдерге санкция салумен сес көрсетуіне ШЫҰ мәлімдемесі теріс жауап беріп, мүше елдердің бұл қорқытулардан қорықпайтынын көрсетті.
Мәлімдемеде Иранның Ядролық қаруды таратпау туралы шартқа мүше ел ретінде бейбіт атом энергиясын пайдалану құқығы қолдау тапқан.
Мохсен Пакайин сөзін қорытындылай келе, бұл мәлімдеменің тек саяси құжат емес, сонымен бірге көпжақтылықты нығайту мен біржақтылыққа қарсы тұруға бағытталған болашақ стратегия екенін баса айтты. ШЫҰ болашақ әлемдік жүйеде маңыздырақ рөл атқарғысы келеді. Бұл бағытта Ресей, Қытай, Үндістан мен Пәкістан сияқты елдердің рөлі ерекше болмақ.












