Түркия Сыртқы істер министрі Хакан Фидан қазір Сирияда ұлттық бірліктің уақыты келгенін айтты.
Еуразия Тудейдің хабарлауы бойынша, бұл туралы Хакан Фидан Анкарада омандық әріптесі Бадр бин Хамад әл-Бусаидимен өткен бірлескен баспасөз мәслихатында мәлімдеді.
Түркия Сыртқы істер министрі: “Біз қорғаныс өнеркәсібі саласындағы ынтымақтастығымызды өзара тиімділік қағидатына негіздеп дамытқымыз келеді. Бұл салада қазірдің өзінде сәтті жобалар жүзеге асырылуда. Сонымен қатар, екі ел арасындағы экономикалық, саяси және мәдени салалардағы ынтымақтастық та зор әлеуетке ие”, -деді.
Министр Хакан Фидан Президент Режеп Тайып Ердоғанның Оманға сапары кезінде 16 келісімге қол қойылғанын, кездесу барысында омандық әріптесімен жүргізіліп жатқан жобалар мен болашақ жоспарлар талқыланғанын айтты.
Фидан Түркия мен Оман арасындағы екіжақты сауда көлемін 5 миллиард долларға жеткізу бойынша жұмыс жүргізіліп жатқанын қуаттап, екі ел арасында визасыз режим енгізілгенін айтты.
Сонымен қатар, Түркия Сыртқы істер министрі бірқатар мәселеге, соның ішінде Сириядағы жағдайға тоқталып: “Сирияда қазір ұлттық бірлік уақыты. Сирия демократиялық күштері өз міндетін орындауы керек. Алайда, олар Израиль саясатының құралына айналып отыр”,-деді.
Фидан Түркияның ұлттық қауіпсіздігі тұрғысынан Сириядағы оқиғалардың барысы өте маңызды екенін айтып: “Біз жағдайды мұқият қадағалап отырмыз. Біз тұрақтылық пен аймақтық бейбітшілікті көргіміз келеді. Басқа мақсатымыз жоқ”, -деді.
Фидан Сирия, Америка Құрама Штаттары және Израиль арасындағы келіссөздер аймақ, аумақтық тұтастық, қауіпсіздік және тұрақтылық мүддесі үшін сәтті аяқталады деген үміт білдірді.



















