Түркияның Baykar қорғаныс компаниясы Киевте ұшқышсыз ұшақтар шығаратын зауыттың құрылысын бастады.
Бұл туралы Baykar компаниясының бас директоры Халук Байрактар Эр-Риядтағы World Defence Show көрмесінде мәлімдеді.
Халук Байрактардың айтуы бойынша, бүгінде зауыттың құрылысы басталып кеткен. Зауытты аяқтау үшін шамамен 12 ай қажет.
Baykar бас директорының сөзіне қарағанда, Киев маңында салынып жатқан зауыт өте үлкен, әрі онда 500-ге жуық адамды жұмыспен қамту жоспарланып отыр.
Сонымен қатар, директор жаңа зауыт жыл сайын шамамен 120 бірлік ұшқышсыз ұшақ шығаратынын айтты.
Baykar бас директорының Reuters агенттігіне берген сұхбатында зауытта TB2 немесе TB3 ұшқышсыз ұшақтары шығарылатыны айтылды.
Сондай-ақ, компания директоры Сауд Арабиясында да алдағы екі жылда Ыстанбұлда орналасқан фирманың өндірісті бастау жоспарларының іске асатынын мәлімдеді.
Соңғы уақытта ұшқышсыз ұшақтар құрлықта да, әуеде де, теңізде де маңызды қаруға айналып бара жатыр.
Түркияның «Байрактар» ұшқышсыз ұшақтары Украина әскерінің ұрыс алаңында осы қару арқылы Ресей армиясына қарсылық көрсеткеннен кейін бүкіл әлемге танылды.
Айта кетсек, желтоқсан айында Украина президенті Владимир Зеленский 2024 жылы миллиондаған ұшқышсыз ұшақ шығарылатынына уәде беріп, Украина қарулы күштері құрамында ұшқышсыз ұшақтарға арналған жеке бөлімше құруға тапсырма берді. Зеленскийдің пікірінше, бұл Ресейге қарсы соғыста нақты нәтиже береді.



















