Тәжікстан Республикасының Елшілігі Алматы-Екатеринбург тас жолында өз азаматтарын құтқарғаны үшін Ақмола облысының Төтенше жағдайлар департаменті мен полициясына алғысын білдірді.
Аvesta.tj агенттігінің хабарлауы бойынша, Тәжікстан Республикасының Астанадағы Елшілігі Алматы-Екатеринбург тас жолында өз азаматтарын құтқарып қалғаны үшін Ақмола облысының Төтенше жағдайлар департаменті мен полициясына деген құрметі мен алғысын Қазақстанның Сыртқы істер министрлігіне жолдады.
Ақмола облысы ТЖД баспасөз қызметінің мәліметінше, 15 ақпан күні Жақсы ауданында полиция, төтенше жағдайлар қызметі және жергілікті атқарушы органдар бірлесіп, шетелдік автобус жолаушыларын қар құрсауынан шығарып, жылыту пунктеріне орналастырған.
Ақмола облысы полиция департаментінің мәліметінше, полиция қызметкерлері 30 градус аязда жолда қалған жолаушыларды құтқару және жылу орталықтарына орналастыру шараларын ұйымдастырды. Нәтижесінде 124 шетел азаматы, оның ішінде Өзбекстанның 15 және Тәжікстанның 109 азаматы ыстық тамақ пен түнейтін орындармен қамтамасыз етілді.
Сонымен қатар автобустардың ақауларын жөндеп, жолаушылардың қайта жолға шығуына көмек берілді.













