Өзбекстанға ресми сапармен келген Ресей Президенті Владимир Путин қандай келіссөздер жүргізіп, қандай құжаттарға қол қойды?
Еуразия Тудейдің хабарлауы бойынша, Ресей Президенті Владимир Путин 26 мамыр күні Өзбекстанға барды. Бұл Путиннің бесінші президенттік мерзімі басталғалы Бейжің мен Минскіден кейінгі үшінші шетелге сапары.
Владимир Путинді 26 мамыр күні Ташкент халықаралық әуежайында Шавкат Мирзиеев қарсы алды. Владимир Путин Шавкат Мирзиеевпен бірге «Жаңа Өзбекстан» саябағында болып, Тәуелсіздік монументіне гүл шоғын қойды.
Сапардың негізгі шаралары кеше, 27 мамырда өтті.
27 мамыр күні «Куксарай» резиденциясында Владимир Путинді қарсы алу рәсімі өтті. Резиденция алаңында дәстүрлі рәсімнен кейін Путин мен Мирзиеевтің шағын құрамдағы келіссөздері басталды.
«Куксарай» резиденциясында өткен кездесуде Мирзиеев Ресей Президенті болып қайта сайланғаннан кейін алғашқы шетелдік сапарларының бірі ретінде Өзбекстанға келуін ерекше атап өтті.
Кездесуде тараптар Өзбекстан мен Ресей арасындағы жан-жақты стратегиялық серіктестік қатынастарды одан әрі арттыру және тереңдету мәселелерін талқылады.
Сұхбат барысында сауда-экономикалық ынтымақтастықтың қарқыны артып келе жатқаны тілге тиек етілді.
Екі ел басшылары білім беру және инженер кадрларды даярлау саласындағы ынтымақтастыққа баса назар аударды.
Сонымен қатар, Өзбекстанда Бауман атындағы Мәскеу техникалық университетінің және Бүкілресейлік сыртқы сауда академиясының филиалдарын ашу жөніндегі келісімдерге қол жеткізілді.
Сондай-ақ кездесуде орнықты саяси консультацияларды жалғастыру, БҰҰ, ТМД, ШЫҰ сынды халықаралық және өңірлік ұйымдармен тығыз ынтымақтастық орнату қажеттігі айтылды.
Сонымен қатар, Владимир Путиннің сапары аясында Өзбекстанда қуаты аз атом электр станциясын салу жобасын іске асыру туралы уағдаластыққа қол жеткізілді.
Ресей Президенті Владимир Путиннің Өзбекстанға мемлекеттік сапары барысында жалпы 27 құжатқа қол қойылды.



















