Өзбекстан Сыртқы істер министрлігі 12 ақпанда АҚШ елшілігімен бірлесіп, білім беру саласындағы ағымдағы жобаларды таныстырды. Шара барысында білімге арналған арнайы гранттар табыс етілді. Бұл туралы Өзбекстанның Сыртқы істер министрлігі хабарлады.
Шараға Өзбекстан Республикасы Сыртқы істер министрінің орынбасары Музаффар Мадрахимов, АҚШ-тың халықаралық даму агенттігінің (USAID) Өзбекстандағы миссиясының директоры Дэвид Хоффман бастаған екі елдің шенеуніктері, білім саласының мамандары мен «Ел-юрт үміті» қорының жетекшілері қатысты.
АҚШ өкілдері ғылым және білім саласындағы ағымдағы жобалар мен осы бағыттағы ынтымақтастықты тереңдетудің қысқа мерзімді жоспарлары туралы презентация жасады.
Екі елдің өкілдері білім беру жүйесін реформалау, адами капиталды нығайту, ағылшын тілін оқытуды қолдау және университеттер арасындағы серіктестікті кеңейту бойынша жобаларды жүзеге асыруға қатысты ұйымдастырушылық-техникалық аспектілер тұрғысында жан-жақты пікір алмасты.


















